سەرۆک بارزانی پێشوازی لە ڕاوێژكاری ئاساییشی نیشتیمانیی عێراق كرد

هەولێر-KDP.info- ئەمڕۆ  سەرۆكی هەرێمی كوردستان (سەرۆک بارزانی) پێشوازی لە ڕاوێژكاری ئاساییشی نیشتیمانیی عێراق (فاڵح فەیاز) كرد.. لەکۆبوونەوەکەدا بارودۆخی مەیدانیی بەرەكانی ڕووبەڕووبوونەوەی تیرۆریستانی داعش و هەروەها سەركەوتنەكانی هێزی پێشمەرگەی كوردستان خرایە بەر باس و قسەیش لەبارەی شكستەكانی ڕێكخراوی تیرۆریستیی داعش لە پارێزگای ئەنبار و دیالی كرا.

لە سەرەتای دیدارەكەدا ڕاوێژكاری ئاساییشی نیشتیمانیی عێراق(فاڵح فەیاز)  پیرۆزبایی لە (سەرۆك بارزانی) كرد بە بۆنەی ئەو سەركەوتنانەی هێزەكانی پێشمەرگەی كوردستان لە بەرەكانی جەنگی دژی ڕێكخراوی تیرۆریستیی داعش بەدەستیانهێناوە و ڕۆڵی سەركردایەتی و ئامادەبوونی (سەرۆك بارزانی) لە بەرەكانی جەنگ بەرز نرخاند و بە هۆكارێكی یەكلاییكەرەوەی سەركەوتنەكانی پێشمەرگە لەدژی داعش لەقەڵەمدا.
لەم دیدارەدا بارودۆخی مەیدانیی بەرەكانی ڕووبەڕووبوونەوەی تیرۆریستانی داعش و هەروەها سەركەوتنەكانی هێزی پێشمەرگەی كوردستان خرایە بەر باس و قسەیش لەبارەی شكستەكانی ڕێكخراوی تیرۆریستیی داعش لە پارێزگای ئەنبار و دیالی كرا.
هەر لەم كۆبوونەوەیەدا جەخت لە ئازادكردنی سەرجەم ناوچەكانی ژێر دەستەڵاتی داعش و یارمەتیدانی ئاوارەكان بۆ گەڕانەوەیان بۆ شوێنەكانیان كرایەوە.
لە بەشێكی دیكەی ئەم كۆبوونەوەیەدا چۆنییەتی ڕووبەڕووبوونەوەی تیرۆریستان لە قۆناغی داهاتوو و پەیوەندییە سیاسی و هاوكارییە ئەمنی و سەربازییەكانی نێوان هەرێم و بەغدا تاوتوێ كرا.