نێچیرڤان بارزانی: هه‌رێمى كوردستان به چاوى بایه‌خه‌وه ده‌ڕوانێته په‌یوه‌ندییه‌كانى له‌گه‌ڵ ڕووسیا
هەولێر-KDP.info-سەرۆکوەزیرانی کوردستان (نێچیرڤان بارزانی) لە پێشوازی نێردراوی تایبەتی سەرۆکی روسیا رایگەیاند کە، هه‌رێمى كوردستان به چاوى بایه‌خه‌وه ده‌ڕوانێته په‌یوه‌ندییه‌كانى له‌گه‌ڵ ڕووسیا.
سه‌ر له به‌یانیى ئه‌مڕۆ سێشه‌ممه، 20-1-2015، (نێچیرڤان بارزانى) سه‌رۆكوه‌زیرانى هه‌رێمى كوردستان، پێشوازى له نێردراوى تایبه‌تى سه‌رۆكى ڕووسیا بۆ ڕۆژهه‌ڵاتى ناوه‌ڕاست و ئافریكا و جێگرى وه‌زیرى ده‌ره‌وه (میخائیل بۆگدانۆڤ) و شاندێكى یاوه‌رى كرد كه له ژماره‌یه‌ك له دیپلۆماتكاران و پیاوانى كار و نوێنه‌رانى هه‌ردوو كه‌رتى گشتى و تایبه‌تى ڕووسیا، پێكهات بوو.
له دیدارێكدا نێردراوى تایبه‌تى سه‌رۆك پوتین ڕایگه‌یاند بۆ ئه‌وه‌ى له نزیكه‌وه ئاگادارى ڕه‌وش و پێشهاته‌كانى عێراق و هه‌رێمى كوردستان بن و له چۆنیه‌تیى په‌ره‌پێدانى هه‌ماهه‌نگیى هاوبه‌ش بۆ به‌ره‌وپێشبردنى زیاترى په‌یوه‌ندییه‌كانى هه‌ولێر و مۆسكۆ بكۆڵنه‌وه، سه‌ردانى هه‌رێمى كوردستانیان كردووه. هه‌روه‌ها باس له په‌یوندییه‌كانى نێوان هه‌ردوو گه‌لى كوردستان و ڕووسیا كرا كه ده‌گه‌ڕینه‌وه ناوه‌ڕاستى سه‌ده‌ى ڕابردوو كاتێك ئه‌و سه‌رده‌مه جه‌نه‌راڵ مسته‌فا بارزانى و هاوه‌ڵانى له ڕووسیا ماونه‌ته‌وه.
شه‌ڕى دژى تیرۆرستانى داعش و سه‌ركه‌وتنه به‌رده‌وامه‌كانى پێشمه‌رگه و گرینگى و كاریگه‌ریى هاوپه‌یمانیى نێوده‌وڵه‌تى بۆ ڕووبه‌ڕووبوونه‌وه‌ى تیرۆر كه مه‌ترسییه‌كى جیهانییه، به‌شێكى دیكه‌ى دیداره‌كه بوو، تیایدا باس له گرنگیى هه‌ماهه‌نگى و گۆڕینه‌وه‌ى زانیاریى هه‌واڵگرى له نێوان ده‌زگا په‌یوه‌نداره‌كانى عیراق و هه‌رێمى كوردستان و ڕووسیا بۆ به‌ره‌نگاربوونه‌وه‌ى تیرۆرستان كرا و شانده‌كه پشتگیریى ڕووسیایان بۆ هه‌رێمى كوردستان دووپات كرده‌وه. هه‌روه‌ها تیشك خرایه سه‌ر كۆمه‌ك و هاوكارییه‌كانى ڕووسیا بۆ هه‌رێمى كوردستان و به‌ڕێز سه‌رۆك وه‌زیران سوپاسى ڕووسیاى كرد كه له ڕووى مرۆییه‌وه هاوكاریى هه‌رێمى كوردستانى كردووه و كۆمه‌ك و یارمه‌تیى مرۆیى پێشكه‌ش به ئاواره و په‌نابه‌ران كردووه.
له دیداره‌كه‌دا كارى كۆمپانیا ڕووسییه‌كان له هه‌رێمى كوردستان به‌تایبه‌تیش له بوارى هاریكاریى وزه و سه‌رچاوه سروشتییه‌كاندا، له‌گه‌ڵ كار و چالاكیى كۆمپانیا بارزگانى و وه‌به‌رهێنه‌ره‌كانى ڕووسیا له هه‌رێمى كوردستان تاوتوێ كرا و سه‌رۆكوه‌زیران دووپاتى كرده‌وه كه هه‌رێمى كوردستان به چاوى بایه‌خه‌وه ده‌ڕوانێته په‌یوه‌ندییه‌كانى له‌گه‌ڵ ڕووسیا و كۆمپانیا ڕووسییه‌كانیش هه‌موو ده‌رفه‌تێكیان هه‌یه له بواره جیاكاندا له هه‌رێمى كوردستان كار بكه‌ن، هه‌رێمى كوردستانیش ده‌توانێت له زۆر بواردا سوود له ئه‌زموون و پسپۆڕییه‌كانى ڕووسیا وه‌ربگرێت.
له لایه‌نێكى دیكه‌ى دیداره‌كه‌دا، ڕه‌وشى ناوچه‌كه به‌گشتى و بارودۆخى سووریا به‌تایبه‌تى خرایه به‌ر باس و له‌مباره‌یه‌وه (نێچیرڤان بارزانى) گوتى: كێشه‌ى سووریا له ڕێگه‌ى شه‌ڕه‌وه چاره ناكرێت و ده‌بێ له ڕێگه‌ى دیالۆگه‌وه چارەیەكى سیاسیانه‌ى بۆ بدۆزرێته‌وه. كار و چالاكییه‌كانى كونسولخانه‌ى گشتیى ڕووسیا له هه‌ولێر و په‌یوه‌ندییه‌كانى هه‌رێمى كوردستان و وڵاتانى دراوسێ، به‌شێكى دیكه‌ى دیداره‌كه بوو. هه‌روه‌ها شاندى ڕووسى خۆشحاڵى و پشتگیریى خۆى بۆ دوایین ڕێككه‌وتنى هه‌ولێر و به‌غدا و هه‌وڵى چاره‌سه‌ركردنى كێشه‌كانى نێوان حكوومه‌تى هه‌رێمى كوردستان و حكوومه‌تى عیراق ده‌ر‌بڕى.
