بنگەهێ لالش: ڕۆلێ سەرۆک بارزانی و هێزێن پێشمەرگەی بۆ ئازادکرنا شنگالێ بلند دنرخینین
ھەولێر-KDP.info- ب ھەلکەفتا دەربازبوونا ١١ سالان ل سەر ئازادکرنا شنگالێ ل سەر دەستێ ھێزێن پێشمەرگەیێن کوردستانێ و ب سەرپەرشتییا ڕاستەوخۆ یا سەرۆک مەسعود بارزانی، دەستەیا بلند یا بنگەھێ لالش یێ ڕەوشەنبیری و جڤاکی بەیاننامەیەک بەلاڤکر، ئەڤە دەقێ وێ یە:
بەری یازدە سالان، و ب دیارکری ل ١٣ـی چریا دویێ ٢٠١٥، ھێزێن پێشمەرگەیێن کوردستانێ ب سەرپەرشتییا ڕاستەوخۆ یا جەنابێ سەرۆک بارزانی، و ب پشتەڤانییا ئاسمانی یا فرۆکەیێن ھەڤپەیمانان، باژێرێ شنگالێ ژ دەستێن چەپەلێن تیرۆرستێن داعش ب ئۆپەراسیۆنەکا دیرۆکی ئازادکرن.
ل ٣ـی تەباخا ی ٢٠١٤، شنگال تووشی ئێرشەکا ھۆڤانە ژ ئالیییێ تیرۆرستێن داعشێ ڤە بوو و ھاتە داگیرکرن، کو بوو ئەگەرێ ئەنجامدانا چەندین تاوان و دڕندەییان دەھەقێ خەلکێ سڤیل یێ وێ دەڤەرێ دا.
و پشتی سالەکێ ژ داگیرکرنێ، و ل٤ـی تەباخا ٢٠١٥، سەرۆک بارزانی سۆزا ئازادکرنا شنگالێ دا؛ و پشتی ١٠٠ ڕۆژان ژ وێ سۆزێ، و ل د دەمژمێر ھەفتێ سبێ دا، ئۆپەراسیۆنا ئازادکرنێ ژ چار بەرەیان ڤە ب پشکداریا ٧٥٠٠ پێشمەرگەیان و ب سەرکردایەتییا سەرۆک بارزانی، و ب پشتەڤانییا ئاسمانی یا فرۆکەیێن شەڕکەر یێن ھەڤپەیمانان دەست پێ کر.
و ل ١٣ـی چریا دویێ ٢٠١٥، سەرۆک بارزانی ژ چیایێ شنگالێ مزگینییا ئازادکرنا باژێری ژ تیرۆرستێن داعش دا، و دووپاتکر کو ئەڤ سەرکەفتنە ب دەستکەفتەکێ مەزن بۆ گەلێ کوردستانێ ژ ئالییێن لەشکەری، سیاسی و دیرۆکی ڤە دئێتە ھژمارتن ب خێرا مەردانییا پێشمەرگەیێن قەھرەمان. و مێرخاسییا پێشمەرگەی دەنگڤەدانەکا بەرفرەھـ د دەزگەھێن ڕاگەھاندنا جیھانی دا ھەبوو، و ئازادکرنا شنگالێ بوو دەرگەھەک بۆ ئازادکرنا دەڤەرێن دی یێن دەوروبەرێ وێ و پاشی سەنتەرێ پارێزگەھا نەینەوا.
ئەم ل بنگەھێ لالش دا، ڕۆلێ دیرۆکی یێ سەرۆک بارزانی، و ھێزێن پێشمەرگەیێن کوردستانێ، و ھەموو قەھرەمانێن کو ب خوونا خۆ ئەڤ داستانا قەھرەمانی یا پڕ سەروەری بۆ ئازادکرنا شنگالێ تۆمارکری، بلند دنرخینین. ھەروەسا سوپاسی و پێزانینێن خۆ ئاراستەیی ھێزێن ھەڤپەیمانان دکەین بۆ ڕۆلێ وان یێ ب بھا د پشتەڤانیکرنا پێشمەرگەی و تێکشکاندنا تیرۆرستێن داعش دا.
ئەڤ بیرەوەریە د دەمەکی دا دئێت کو ھێشتا پشکەکا مەزن ژ ئێزدییان، و پشتی دەربازبوونا ١١ سالان ل سەر ئازادکرنێ، ژ ئاوارەبوونێ د ناڤ کەمپان دا دنالن، و نکارینە ڤەگەڕنە سەر مال و حالێن خۆ ژ بەر نەبوونا سەقامگیرییێ و نەبوونا خزمەتگۆزارییان.
لەورا، ئەم داخوازێ ژ ھەموو ئالییێن پەیوەندیدار دکەین کو ب لەز شنگالێ ئاڤادان بکەنەڤە و کەیسا دانپێدانێ ب جینۆسایدێ ئێکلا بکەن و قوربانییێن وێ قەرەبوو بکەن.
بنگەھێ لالش یێ ڕەوشەنبیری و جڤاکی / دھۆک
١٢-١١-٢٠٢٦
