خەسرۆگۆران:پێشبینی ئەوە دەكەین لیستی برایەتى و پێكەوەژیان لە موسل زۆرترین كورسییەكانى ئەنجوومەنى پارێزگا بەدەست بهێنێ
دیمانە- فریاد محەمەد:
خسرۆ گۆڕان بەرپرسی دەزگای هەڵبژاردنی پارتی دیموكراتی كوردستان لەبارەی ئامادەكاری و بەشداری كردنی كورد بەیەك لیست لەهەڵبژاردنی ئەنجوومەنی پارێزگاكانی عێراق دەدوێ و هێما بۆ ئەوەش دەكات پێكهێنانی لیستێكی یەكگرتوو بۆ بەشداری كردن لەهەڵبژاردنی ئەنجوومەنی پارێزگاكانی عێراق لەناوچەكانی دەرەوەی ئیدارەی هەرێمی كوردستان لەبەرژەوەندی كورد دایە. خەسرۆ گۆڕان هاوكات ئەندامی ئەنجوومەنی سەركردایەتی پارتیشە پێشبینی ئەوەش دەكات لیستی برایەتی و پێكەوەژیان لەموسڵ ببێتە لیستی براوەی هەڵبژاردنەكە.
درككردن بەهەڵەكانی پێشوو
هەڵبژاردنی ئەنجوومەنی پارێزگای عێراق هەڵبژاردنێكی زۆر گرنگە بە تایبەتیش بۆ ئەو ناوچە كوردستانییەكانیانەی كە دەكەونە سنووری دەرەوەی ئیدارەی هەرێمی كوردستان بەتایبەت لە پارێزگایانەی هەڵبژاردنی لێ ئەنجام دەدرێ لەپارێزگاكانی موسڵ و دیالە و سەلاحەدین، دوای دەست نیشانكردنی وادەی هەڵبژاردنەكە لەلایەن كۆمسیۆنی باڵای سەربەخۆی هەڵبژاردنن راگەیاندرا پەیوەندییمان بە سەرجەم لایەنە سیاسییەكان كرد بە ئۆپۆزسیۆنیشەوە بۆ ئەوەی هەڵەكانی هەڵبژاردنی پەرلەمانی عێراق دووبارە نەبێتەوە، چونكە لەهەڵبژاردنەكانی پێشوو لەو ناوچە گرنگانە كە پێویستە كوردایەتی بكرێ پێش حزبایەتی، هەبوونی زۆر لیستی كوردی وای كرد دەنگێكی زۆری كورد بەفیرۆ نەچێ، بۆ نموونە لیستەكانی بزووتنەوەی گۆڕان و یەكگرتوو و كۆمەڵی ئیسلامی لیستی سەربەخۆیان هەبوو و لەناو لیستی هاوپەیمانی كوردستانیش كاندیدی زۆر هەبوو بووە هۆی دەنگێكی زۆری كورد بە فیرۆ بچێ و بووە هۆی ئەوەی كورد چەند كورسییەك لەدەست بدات.
9 پارتی سیاسیی لەناو لیستێكی یەكگرتوو
خەسرۆ گۆڕان هێمای بۆ ئەوەش كرد، ئەگەر هاتبوایە ئەو لایەنانە لەناو لیستی هاوپەیمانی كوردستانی بوان ەئەنجامەكەی بەم شێوەیە نە دەبوو كە بوو، رەنگە ئەنجامەكەی ببوایە 7 بۆ كورد 5 بۆ لایەنەكانی تر،ە جێی دلخۆشی بوو ئەو لایەنانە هەموو دركیان بەوە كرد كە ئەو هەڵەی كرد بوویان رەزامەندی ئەوەیان نیشاندا تێكڕای لایەنە سیاسییە كوردستانییەكان بە یەك لیست دابەزین لەو پارێزگایانە، لەبەر ئەوە هەر یەك لە پارتی و یەكێتی و بزووتنەوەی گۆڕان و یەكگرتوو و كۆمەڵ و زەحمەتكێشان و سۆشیالیست و شوعی و بزووتنەوەی ئیسلامی لەناو لیستی برایەتی و پێكەوەژیانن.
لەسەرجەم عێراق لیستی برایەتی و پێكەوەژیان بەیەك ناو دابەزیوە
راشیگەیاند: ئێستاش پارت و لایەنە سیاسییەكانیش بە یەك لیست و لۆگۆ و پەیام و بە یەك ناو و بە یەك ژمارەی لیست بەشدارین، لەگەڵ ئەوەشدا هەر لایەنێك ئازادە بۆ كاندیدەكانی خۆی چ جۆرە بانگێشت و هەڵمەتێك بۆ كاندیدەكانی دەكات، ئەوەی ئەمجارە جیاوازە لەگەڵ هەڵبژاردنەكانی ساڵی 2009 ی هەڵبژاردنی ئەنجوومەنی پارێزگاكانی عێراق بریتیە لەوەی لە هەڵبژاردنی ساڵی 2009 لەهەر پارێزگایەك لیستەكە ناوێكی هەبوو، بۆ نموونە لەپارێزگای موسڵ بە ناوی لیستی برایەتی نەینەوا بوو كە پارێزگایەكی تر ناوێكی تر بەڵام ئەمجارە لەسەرجەم پارێزگاكان بەیەك ناوە ئەویش لیستی برایەتی و پێكەوەژیانە.
لەهەوڵی چارەسەركردنی كێشەی ئەوانن كە ناویان نییە
لەبەشێكی دیكەی قسەكانیدا ئەو ئەندامەی ئەنجوومەنی سەركردایەتی پارتی دیموكراتی كوردستان گوتیشی: گومانی تێیدا نییە كە لیستەكە چەندە بەهێز بێت هێندە لەبەرژەوەندی كوردەو لەسەرەجەم عێراقیش یەك دروشممان هەیە بۆ ئەوەیە میدیاش هێندە ماندوو نەبن، لەگەڵ ئەوەشدا هەندێك كێشەكان لەگەڵ كۆمیسیۆنی هەڵبژاردنەكان هەیە بەوەی هەندێك ناو نەگەڕاوەتەوەو هەندێك ناوی چوار چیوەی ماددەی 140 بزرن و ئەوانەی خەڵكی پارێزگانی موسڵ و پارێزگاكانی ترن و ئێستا لەشارەكانی كوردستان نیشتەجێن وەك پێویست سەردانی ناوەندەكانی تۆماری دەنگدەرانیان نەكردووە ئێستا لەگەڵ كۆمسیۆنی هەڵبژاردنەكان سەرقاڵی چارەسەركردنی كێشەكانین، هەڵمەتی هەڵبژاردنیش بەردەوام و چاپەمەنی كەرەستەی بانگێشە ئامادە كراوە ئەوانەی هاوبەشن، ئەوانەی هاوبەشیش نییە روونە كە چۆن هەر لایەنێك بە چ شێوەیەك هەڵمەت بۆ كاندیدەكانیان رێكدەخا.
پێشبینی دەكرێ لیستی برایەتی و پێكەوەژیان لەموسڵ لیستی براوە بێت
بەرپرسی دەزگای هەڵبژاردنی پارتی دیموكراتی كوردستان چەند فاكتەرێكی گرنگ دەخاتە پێش چاو بەوەی كە لەهەڵبژاردنی ئەمجارەدا كورد لەپارێزگای موسڵ ئەگەری ئەوە لە ئارا دایە ببێتە لیستی گەورەو براوەی پارێزگاكەو لەپارێزگاكەكانی دیكە بەپێی قەبارەی خۆی دەنگی پێویست بەدەست بهێنێ، بۆ ئەم پرسەش گوتی: بۆ ئەوەی دەنگی زیاتر بهێنین سێ تا چوار فاكتەر هەیە، بەر لەهەموو شتێكیش گرنگتر ئەوەیە رێژەی دەنگدەران چەندە لەپرۆسەكە و روونیشە رێژەی دەنگدەران 90٪ بێت یاخود كەمتر، بۆیە رێژەكە چەندە بەرز بێت لەبەرژەوەندی تۆ دایەو چەند دەنگت زیاتر ئەگەری زیاتر بوونی ژمارەی كورسییەكان زیاتر بێت و چەند لیستەكەش یەكگرتوو بێت بێگومان لەبەرژەوەندی كورد دەبێ، جێی دڵخۆشیشە ئەمجارە وەك جاری پێشوو نییە لە ساڵی 2009 بۆ نموونە لە موسڵ دوو لیست بەهێز هەبوو، لیستی حەدبا كە نوێنەرایەتی كۆی عەرەبی ئەو شارەی دەكرد بەتایبەتیش عەرەبی شۆڤینی و لیستی برایەتیش نوێنەرایەتی كوردستانیانی دەكرد، ئەمجارە جیاوازە لیستەكانی بەرامبەرمان یەكگرتوو نین و لەناوخۆیان ناكۆكن و پەرتەوازە بوون و لیستی حەدبا كە لەهەڵبژاردنی رابردوو 19 كورسی بەدەست هێنا ئێستا بۆنەتە سێ پارچە، بۆیە ئەگەری ئەوە لە ئارادایە لیستی برایەتی و پێكەوەژیانی كوردستانیان بە تایبەتی لەپارێزگای موسڵ زۆرترین رێژەی دەنگدەران بەدەست بهێنن و ببێتە لیستی براوە، لەگەڵ ئەوەشدا روونە كە كورد لەپارێزگای سەلاحەدین و دیالە زۆرینە نییە بەڵام پێشبینیەكانی ئێمە ئەوەیە بەپێی بوون و قەبارەی خۆی دەنگی پێویست بەدەست دەهێنن.
خەسرۆ گۆڕان داواشی لەدەنگدەران كرد بەرووی سندوقەكانی دەنگدان بچن و دەنگ بە لیستی برایەتی و پێكەوەژیان بدەن، چونكە دەنگدانی ئەوان ئەركێكی نەتەوەیی و نیشتمانی و كوردستانییە و دەبێتە هۆی گەڕانەوەی ئەو ناوچانەی ئێستا لەدەرەوەی ئیدارەی هەرێمی كوردستانن، هاوكات رووی داواكاری خۆشی ئاراستە ئەو كوردانەش كرد كە ئێستا لەشارەكانی تری هەرێمی كوردستان نیشتەجێن هەر لە شوێنی نیشتەجێ بوونی ئێستایان روو لەسندوقەكانی دەنگدەران بكەن و بە
هەستێكی كوردپەروەرو نیشتمانپەروەرانە دەنگ بە نوێنەرانیان بدەن.
