145 پرۆژێن نوى ل پارێزگه‌ها دهۆكێ دێ كه‌ڤنه د بوارێ بجهئینانێ دا
دهۆك-KDP.info-د به‌رده‌وامیا چێكرنا پرۆژێن خزمه‌تگۆزارى دا یێن كو ل سه‌ر ده‌مێ كابینا نه‌هێ یا حكومه‌تا هه‌رێما كوردستانێ ل پارێزگه‌ها دهۆكێ دهێنه ئه‌نجامدان ئه‌ڤرۆ رۆژا ئێكشه‌مبى (پ.د.عه‌لى ته‌ته‌ر) پارێزگارێ دهۆكێ د كۆنگره‌كێ رۆژنامه‌ڤانى دا 145 پرۆژێن نوى یێن خزمه‌تگۆزارى ل پارێزگه‌ها دهۆكێ بۆ سالا 2022ێ ب كۆژمێ پترى 48 ملیار دیناران راگه‌هاندن و گۆت: "ل ده‌مه‌كێ ئه‌ڤ پرۆژه دێ كه‌ڤنه د بوارێ بجهئینانێ دا".
پ.د.عه‌لى ته‌ته‌ر، پارێزگارێ دهۆكێ دیار كر كو پتریا نیڤا پرۆژێن خزمه‌تگۆزارى یێن ل سالا بۆرى ل پارێزگه‌ها دهۆكێ كه‌فتینه د بوارێ بجهئینانێ دا ب دووماهى هاتینه و ئه‌و پرۆژێن ماین ژى نوكه كار یێ تێدا به‌رده‌وامه و ب فه‌رمانا سه‌رۆكێ حكومه‌تا هه‌رێما كوردستانێ ئاریشێن وان یێن دارایى هاتینه چاره‌سه‌ركرن و ئه‌ڤرۆ ژى كۆژمه‌كێ پاره‌ى بۆ به‌لێنده‌ران هاتیه مه‌زاختن و گۆت: "د قووناغا ئێكێ یا پرۆژێن سالا 2022ێ دا 145 پرۆژێن نوى یێن خزمه‌تگۆزارى ب كۆژمێ 48 ملیار و 112 ملیۆن و 350 هزار و 680 دیناران دێ ل پارێزگه‌ها دهۆكێ هێنه چێكرن و ل ده‌مه‌كێ نێزیك ب رێیا ته‌نده‌ران ئه‌ڤ پرۆژه دێ كه‌ڤنه د بوارێ بجهئینانێ دا".
پارێزگارێ دهۆكێ ئاماژه دا وێ چه‌ندێ كو ئه‌ڤ پرۆژێن خزمه‌تگۆزارى ب شێوه‌یه‌كێ دادپه‌روه‌رانه دێ ل هه‌مى ناحیه و قه‌زایێن پارێزگه‌ها دهۆكێ هێنه ئه‌نجامدان و گۆت: "ل ده‌مه‌كێ نێزیك دێ قووناغا دووێ ژى یا پرۆژێن خزمه‌تگۆزارى ل پارێزگاها دهۆكێ هێته راگه‌هاندن كو پرۆژێن مه‌زنترن و ئه‌و پرۆژێن دكه‌ڤنه د بوارێ بجهئینانێ دا هه‌مى ئه‌و پرۆژێن گرنگن كو ب ژیانا خه‌لكى ڤه د گرێدایى".
رێوار محه‌مه‌د ره‌شید
