پرۆژێن خزمەتگۆزاری دێ ل ناحیا دەرکارێ ھێنە چێکرن
دھۆک -KDP.info- ب مەرەما گەھاندنا پرۆژێن خزمەتگۆزاری یێن زێدەتر بۆ قەزا و ناحیێن ل سنوورێ ئیدارا سەربەخۆ یا زاخۆ ئەڤرۆ رۆژا چارشەمبی ١/٦/٢٠٢٢ رازەمەندی ھاتەکرن ب کۆژمێ پتری چار ملیار دیناران پرۆژێن خزمەتگۆزاری ل ناحیا دەرکارێ بھێنە چێکرن.
گوھدار شێخۆ، سەرپەرشێ ئیدارا سەربەخۆ یا زاخۆ پشتی ئەڤرۆ رۆژا چارشەمبی ١/٦/٢٠٢٢ سەرەدانا ناحیا دەرکارێ کری د کۆنگرەکێ رۆژنامەڤانی دا ئاشکرا کر ژ پێخەمەت بەرژەوەندیا گشتی یا خەلکێ دەڤەرێ و ناحیا دەرکارێ و ل ڕاسپاردا سەرۆکێ حکومەتا ھەرێما کوردستانێ رازەمەندی ل سەر چەندین پرۆژێن خزمەتگۆ زاری ل سەر بۆدجا گەشەپێدانا ھەرێمێ، ب کۆژمێ چار ملیار و ٦٥٠ ملیۆن دیناران ھاتەکرن و گۆت: "ب کۆژمێ سێ ملیار و ٥٠ ملیۆن دینارا نەخۆشخانەکا ژ جورێ Class A دێ ل سەر جووت سایدێ سەرەکی یێ ناڤخۆیا دەرکارێ ھێتە چێکرن".
سەرپەرشتێ ئیدارا سەربەخۆ یا زاخۆ ئاشکرا کر کو ھەر د چارچۆڤێ وان پرۆژان دا یێن کو ڕازەمەندی ل سەر ھاتیەکرن بکەڤنە د بوارێ بجھئینانێ دا چێکرنا ڕێکێن ناڤخۆیێن کۆمەلگەھا بیرسڤێ و سۆلین و ئاڤرێژێن وێ ب کۆژمێ ٦٠٠ ملیۆن دیناران، ھەروەسا پرۆژێ چێکرنا ڕێکێن ناڤخۆ ب فرەھیا ١٢مەتر و ١٥ مەتر و ٢٠ مەتر دگەل سۆلینێن ئاڤرێژ ل سنوورێ باژێرڤانیا دەرکارێ، ھەروەسا چێکرنا ژوورا پەمپان دگەل دابینکرنا پەمپان بۆ پرۆژێ ئاڤا (ھیزاوا - دەرکار ) ب گۆژمێ ١٠٠ ملیۆن دیناران،
ھەروەسا سەخبیرکرنا ڕێکا گوندێن بەرزیر و شەرانش تا دەشتەتەخ و سەخبیرکرنا ڕێیا گوندێ ئیسف ئاغا و گوندک ئەیوب و سنداڤا ب گوژمێ ٧٠٠ ملیۆن دیناران و نووژەنکرنا سیلاڤا شەرانش و شکەفتا بھێرێ ب کۆژمێ ٢٠٠ ملیۆن دیناران.
گوھدار شێخۆی خویا کر کو ژ بلی وان پرۆژێن نوی یێن کو دێ کەڤنە د بوارێ بجھئینانێ دا نوکە کار د چێکرنا ھندەک پرۆژان دا ل سنوورێ ناحیا دەرکارێ یێ بەردەوامە کو ئەڤ پرۆژە ب کوژمێ ( ١.٠٧٥.٤٣٠.٠٠٠) ملیار دیناران ل سەر بۆدجا ئیدارا سەربەخۆ یا زاخۆ یێن دھێنە چێکرن.
رێوار محەمەد رەشید
