ده‌ست ب نووژه‌نكرنا رێیا دناڤبه‌را (چره – روڤیا) دا هاته‌كرن
دهۆك-KDP.info- رێڤه‌به‌را رێك و پرا ل پارێزگه‌ها دهۆكێ راگه‌هاند كو ل رۆژێن بۆرى ده‌ست ب نووژه‌نكرنا رێیا دناڤبه‌را (چره – ناحیا رۆڤیا) دا ل سنوورێ قه‌زا شێخان یا سه‌ر ب پارێزگه‌ها دهۆكێ ڤه هاتیه‌كرن و ژڤانه د ده‌مێ شه‌ش هه‌یڤان دا ئه‌ڤ پرۆژه ب دووماهى بهێت.
خه‌دیجا محه‌مه‌د ئه‌حمه‌د، رێڤه‌به‌را رێك و پرا ل پارێزگه‌ها دهۆكێ بۆ مالپه‌رێ فه‌رمیێ پارتى دیموكراتى كوردستان ئاشكرا كر كو د به‌رده‌وامیا پرۆژێن ستراتیژى یێن ل پارێزگه‌ها دهۆكێ دهێنه چێكرن ب تایبه‌تى پرۆژێن رێ و بانان ل رۆژێن بۆرى ب كوژمێ سێ ملیار دیناران ده‌ست ب نووژه‌نكرنا رێیا دناڤبه‌را (چره – روڤیا) دا ل سنوورێ قه‌زا شێخان یا سه‌ر ب پارێزگه‌ها دهۆكێ ڤه هاتیه كرن و ژڤانه د ده‌مێ شه‌ش هه‌یڤێن داهاتى دا ئه‌ڤ پرۆژه ب دووماهى بهێت.
ناڤهاتیێ ئاماژه دا وێ چه‌ندێ كو ل سالا 2011 ده‌ست ب چێكرنا ڤى پرۆژه‌ی هاتبووكرن و 37 ملیار دینار بۆ هاتبوونه ته‌رخانكرن كو ئه‌ڤ پرۆژه ژ چار به‌شان پێك دهات دوو به‌ش ژى ڤى پرۆژه‌ى هاتبوونه بجهـ ئینان، به‌لێ ل سالا 2014 ژ به‌ر په‌یدابوونا قه‌یرانا دارایى یا سه‌ر ب هه‌رێما كوردستانێ دا هاتى به‌لێنده‌رى پرۆژه راوه‌ستاندبوو، لێ ل رۆژێن بۆرى ب پشته‌ڤانیا پارێزگه‌ها دهۆكێ و وه‌زاره‌تا ئاڤه‌دانكرنێ یا حكومه‌تا هه‌رێما كوردستانێ ب كوژمێ سێ ملیار دیناران ده‌ست ب به‌شێ سێیێ یێ ڤى پرۆژه‌ى هاته‌كرن ئه‌و ژى نووژه‌نكرنا رێیا دناڤبه‌را (چره – رۆڤیا) دا یه و گۆت: "د به‌شێ چارێ یێ ڤى پرۆژه‌ى دا دێ ده‌ست ب نووژه‌نكرنا رێیا به‌رده‌ره‌ش ژى هێته‌كرن و پارێ پێدڤى ژى بۆ ڤێ مه‌ره‌مێ هاتیه ته‌رخانكرن".
ل دووماهیێ رێڤه‌به‌را رێك و پرا ل پارێزگه‌ها دهۆكێ خویا كر كو نووژه‌نكرنا ڤێ رێیا ستراتیژى دێ خزمه‌تا خه‌لكێ هه‌رێما كوردستانێ ب شێوه‌یه‌كێ گشتى كه‌ت و دێ بیته ئه‌گه‌ره‌كێ سه‌ره‌كى كو روودانێن هاتنوچوونێ ل سه‌ر ڤێ رێیێ كێم ببن، ژ به‌ر كو نوكه رێیا ستراتیژى یا د ناڤبه‌را پارێزگه‌ها (دهۆك – هه‌ولێر) دا ب شێوه‌یه‌كێ گه‌له‌ك باش هاتیه چێكرن و بتنێ ئه‌ڤ پارچه د ناڤ دا مابوو نه‌هاتیه چێكرن.
رێوار محه‌مه‌د ره‌شید
