٢٨ سالیا دامەزراندنا بنگەھێ لالش ل دھۆکێ ھاتە ساخکرن
دھۆک-KDP.info- د رێورەسمەکی دا ئەڤرۆ رۆژا ١٢/٥/٢٠٢١ ێ (٢٨) سالیا دامەزراندنا بنگەھێ لالش یێ رەوشەنبیری و جڤاکی ب ئامادەبوونا چەندین رەوشەنبیر و کەسایەتیێن دەڤەرێ ل ھۆلا بنگەھێ ناڤھاتی ل باژێرێ دھۆکێ ب پێشکێشکرنا سمینارەکێ و بەلاڤکرنا گۆڤارا (لالش) یا ژمارە ٤٥ ھاتە ساخکرن.
شێخ شامۆ، سەرۆکێ بنگەھێ لالش یێ رەوشەنبیری و جڤاکی ل پارێزگەھا دھۆکێ بۆ مالپەرێ فەرمیێ پارتی دیموکراتی کوردستان دیار کر کو ئەرشیفێ بنگەھێ لالش دیدەڤانێ وێ چەندێ یە کو بنگەھێ ناڤھاتی د سالێن بۆری دا چەند خزمەت گەھاندیە ھەمی بوارێن ژیانێ بتایبەتی د ناڤێ جڤاکێ ئێزدیان دا.
ناڤھاتی ئاماژە دا وێ چەندێ کو ل سەر ئاستێ رەوشەنبیری بنگەھێ لالش د دەرگەھەکێ دیموکراسی دا دەربازی مەیدانا رەوشەنبیریا کوردستانێ بوویە ب گۆڤار و پرتووک و رۆژنامە و بەرنامێن خوە یێن رادیۆ و تەلەڤزیۆنان و ھتد... مل ب ملێ دەزگەھێن دی خزمەتا پەیڤا رەسەنا کوردناسیێ کریە، ھەروەسا ژ روویێ جڤاکی ژی ڤە پێکڤەژیانەکا خورت دگەل نەتەوە و پێکھاتێن دی یێن د ناڤ ھەرێما کوردستانێ دا دژین ئاڤاکریە.
ل دووماھیێ سەرۆکێ بنگەھێ لالش یێ رەوشەنبیری و جڤاکی ل پارێزگەھا دھۆکێ خویا کر کو بنگەھێ لالش بەردەوام زمانەکێ زانستی یێ گەھاندنا راستیا فەلسەفا ئولا ئێزدیانە بۆ ھەر مێھڤانەکی یان شاندەکی و گۆت: "بنگەھێ لالش ژ لایێ نەتەوەیی ژی ڤە بەردەوام بەرەڤانی ژ ھەبوون و ناسناما ئێزدیان کریە بەرامبەر کەسێن شوفێنی یێن کو ئێزدی ژ ئاخا وان دوور دکرن".
رێوار محەمەد رەشید
