دوو رێڤەبەرێن گشتی ل دھۆکێ ھاتنە گوھۆڕین
دھۆک-KDPinfo- د دوو رێورەسمێن جودا دا ئەڤرۆ رۆژا ١٠/١٢/٢٠٢٠ دوو رێڤەبەرێن نوی ل پارێزگەھا دھۆکێ دەست ب کاربوون کو ل ١/٩/٢٠٢٠ ژ لایێ ئەنجومەنێ پارێزگەھا دھۆکێ ڤە ھاتبوونە ھەلبژارتن.
ئەڤرۆ ل دەمژمێر ٨:٠٠ سپێدێ ب ئامادەبوونا ئەندازیار (کەمال محەمەد سالح) وەزیرێ کارەبێ ل حکومەتا ھەرێما کوردستانێ و (د.عەلی تەتەر) پارێزگارێ دھۆکێ (شاکر مەحمود) وەکو رێڤەبەرێ نوی یێ کارەبا پارێزگەھا دھۆکێ ل جھێ ئەندازیار (خالد سالح) ھاتە دانان و د ھەمان رێورەسم دا وەزیرێ کارەبێ ل حکومەتا ھەرێما کوردستانێ بەحسێ رەوشا کارەبێ ل ھەرێما کوردستانێ ب گشتی و پارێزگەھا دھۆکێ ب تایبەتی کر و دەستخۆشی ل رێڤەبەرێ بەرێ یێ کارەبێ کر بۆ وی کارێ وی د ھەیاما بۆری دا ئەنجامدایی و داخوازا سەرکەفتێ بۆ رێڤەبەرێ نوی یێ کارەبا پارێزگەھا دھۆکێ کر.
د ھەمان رۆژ دا و د رێورەسمەکێ دی یێ ژ ھەژی دا ل دەمژمێر ١٢:٣٠ نیڤرۆ ب ئامادەبوونا (د. سامان بەرزنجی) وەزیرێ ساخلەمیێ ل حکومەتا ھەرێما کوردستانێ و (د.عەلی تەتەر) پارێزگارێ دھۆکێ (د. ئەفراسیاب موسا) وەکو رێڤەبەرێ نوی یێ ساخلەمیا پارێزگەھا دھۆکێ ل جھێ (د.نزار عسمەت) دەست ب کاربوو.
(د.عەلی تەتەر) پارێزگارێ دھۆکێ د پرێس کۆنفرانسەکی دا دەستخۆشی ل (د. نزار عسمەت) رێڤەبەرێ بەرێ یێ ساخلەمیا پارێزگەھا دھۆکێ کر بۆ وێ خزمەتا وی د سالێن بۆری دا پێشکێشی پارێزگەھا دھۆکێ کری و داخوازا سەرکەفتنێ بۆ (د. ئەفراسیاب موسا) رێڤەبەرێ نوی یێ ساخلەمیا پارێزگەھا دھۆکێ خواست.
(د. سامان بەرزنجی) وەزیرێ ساخلەمیێ ل حکومەتا ھەرێما کوردستانێ د ھەمان پرێس کۆنفرانس دا ئاشکرا کر کو پشتی (د. نزار عسمەت)ی بۆ دەمێ نەە سالان پۆستێ رێڤەبەرێ گشتی یێ ساخلەمیێ ل پارێزگەھا دھۆکێ ب رێڤەبری ئەم ھەمی دیدەڤانێن وی نە کو د سالێن بۆری دا ب تایبەتی د سالێن قەیرانان دا وی ب شێوەیەکێ سەرکەفتی کارێ خوە ئەنجامدایە و شوون دەستێن وی د ناڤ کەرتێ ساخلەمیێ دا د دیارن و بەھراپتریا کارێن خوە ب شێوەیەکێ مەیدانی ئەنجامداینە ل گەل ھێزێن پێشمەرگەی ل شەرێ دژی تیرۆرستێن داعش و ھاتنا ئاواران و ل ڤێ دووماھیێ ژی پشتی بەلاڤبوونا ڤایرۆسێ کۆرۆنایێ کێم تەرخەمی د کارێ خوە دا نەکریە و رۆلێ وی یێ بەرچاڤ بوو ب ھاریکاریا ھەمی نۆشدار و کارمەندێن ساخلەمیا پارێزگەھا دھۆکێ و گۆت: "ئەز بناڤێ وەزارەتا ساخلەمیا حکومەتا ھەرێما کوردستانێ سۆپاسیا وی دکەم و ئەز یێ پشتراستم ل قووناغا داھاتی ژی دێ ل گەل مە یێ بەردەوام بیت و د مفا ژ شیانێن وی ھێتە وەرگرتن و ئەم پشتەڤانین بۆ (د. ئەفراسیاب موسا) وەکو رێڤەبەرێ نوویێ ساخلەمیا پارێزگەھا دھۆکێ دەست ب کاربووی و داخوازا سەرکەفتنێ بۆ دکەین".
رێوار محەمەد رەشید
