ل دەمەکێ نێزیک کارگەھا ڤاڤارتنا گلێشی ل ئامێدیێ دێ کەڤیتە کاری
دھۆک-KDP.info- بەرپرسێ راگەھاندنێ ل رێڤەبەریا گشتی یا باژێرڤانیان ل پارێزگەھا دھۆکێ ئاشکرا کر کو ب رێژا ٨٥% کار د دانانا کارگەھا ڤاڤارتنا گلێشی دا ل کۆمەلگەھا قەدشێ یا سەر ب ناحیا سەرسنکێ ڤە ل سنوورێ قەزا ئامێدیێ ب دووماھی ھاتیە و ل دەمەکێ نێزیک دێ کەڤیتە د خزمەتا خەلکێ دەڤەرێ دا و گۆت: "گلێشێ ١٣ باژێرڤانیێن سنوورێ قەزا ئامێدیێ دێ ل ڤێ کارگەھێ ھێتە ڤاڤارتن".
ئەمیر ئەترووشی، بەرپرسێ راگەھاندنێ ل رێڤەبەریا گشتی یا باژێرڤانیان ل پارێزگەھا دھۆکێ بۆ مالپەرێ فەرمیێ پارتی دیموکراتی کوردستان ئاشکرا کر کو کارگەھا ڤاڤارتنا گلێشی ل قەزا ئامێدیێ یا ل سەر رووبەرێ ٩٦ دونەمێن ئەردی دھێتە دانان کو نوکە ب رێژا ٨٥% کار تێدا ھاتیە ئەنجامدان و ل دەمەکێ نێزیک دێ کەڤیتە د خزمەتا خەلکێ دەڤەرێ دا و گۆت: "ئەڤ کارگەھە یا ژ لایێ کۆمپانیەکا پاقژکرنێ ڤە دھێتە دانان بەرامبەر ڤێ چەندێ حکومەتا ھەرێما کوردستانێ ھەیڤانە دێ ٤٥٠ ملیۆن دیناران بۆ راکرنا گلێشێ ل سنوورێ ١٣ باژێرڤانیێن قەزا ئامێدیێ دەتە ڤێ کۆمپانیێ".
ناڤھاتی ئاماژە دا وێ چەندێ کو پشتی گلێش ل ڤێ کارگەھێ دھێتە ڤاڤارتن ئەو بەرمایکێن باش دێ ھێنە فرۆتن و گۆت: "نوکە رۆژانە نێزیکی ١٥ تەنێن گلێشی ل سنوورێ باژێرڤانیێن قەزا ئامێدیێ دھێنە کۆمکرن و بەھرا پتریا ڤی گلێشی ژی دھێتە سۆتن و ب ڤێ چەندێ ژی کارتێکرن ل ژینگەھێ دھێتەکرن، بەلێ دەمێ ئەڤ کارگەھە دکەڤیتە کاری ئەو مەترسیا نوکە ل سەر ژینگەھێ ھەیی نامینیت و سەرەرایی ڤێ چەندێ دێ چەندین دەلیڤێن کاری ژی بۆ خەلکێ دەڤەرا ئامێدیێ پەیدا بن".
رێوار محەمەد رەشید
