لە شوێنی كرمانج عیززەت، ھەڵگورد نەجیب وەك قایمقامی سۆران هەڵدەبژێردرێت
ھەولێر-KDP.info- سەرۆكی ئەنجومەنی پارێزگای ھەولێر رایگەیاند، ئەمڕۆ ئەنجومەنی پارێزگای ھەولێر كۆدەبێتەوە و تێیدا دەنگ لەسەر كاندیدی قایمقامی نوێی سۆران دەدرێت.
عەلی رەشید، بۆ ماڵپەڕی فەرمیی پارتی دیموكراتی كوردستان گوتی، ئەمڕۆ ئەنجومەنی پارێزگای ھەولێر كۆدەبێتەوە و تێیدا دەنگ لەسەر كاندیدی قایمقامی نوێی سۆران دەدرێت، چونكە پارێزگای ھەولێر بە نووسراو ناوی كاندیدێكی بۆ ئەنجومەن رەوانە كردووە و گۆڕانكاڕی لەو پۆستەدا دەكرێت.
رەشید گوتیشی، لە شوێنی كرمانج عیززەت، ھەڵگورد نەجیب وەك قایمقامی نوێی قەزای سۆران هەڵدەبژێردرێت و دەستبەكار دەبێت.
ھەڵگورد نەجیب لە ساڵی ١٩٧٣لە ناحیەی دیانا لە دایك بووە و لە وەزارەتی پێشمەرگە وەكو ئەفسەر دەوامی كردووە و دامەزرێنەر و بەڕێوەبەری قوتابخانەكانی كامبریجە لە ھەرێمی كوردستان. ناوبراو لە لەندەن بڕوانامەی بەكالۆریۆسی لە زانستی كۆمپیۆتەر وەرگرتووە و لە سویدیش ماستەری لە سیستمی كۆمپیۆتەر و ئینتەرنێت بەدەست ھێناوە.
بڵند ئیبراھیم
