پشکا چاڤدێریا چڕ ل نەخۆشخانا ھیڤی یا زارۆکان ل دھۆکێ ھاتە ڤەکرن
دھۆک-pdk-info. د رێورەسمەکی دا ب ئامادەبوونا ھەر ئێک ژ (فنسنت پوپیۆ) قۆنسلێ ئێکەتیا ئۆرۆپا ل ھەرێما کوردستانێ و (د.عەلی تەتەر) پارێزگەرێ دھۆکێ و (د. نزار عسمەت) رێڤەبەرێ گشتی یێ ساخلەمیێ ل پارێزگەھا دھۆکێ ئەڤرۆ رۆژا ٣/٩/٢٠٢٠ پشکا چاڤدێریا چڕ ل نەخۆشخانا ھیڤی یا زارۆکان ل باژێرێ دھۆکێ ھاتە ڤەکرن.
د. نزار عسمەت، رێڤەبەرێ گشتی یێ ساخلەمیێ ل پارێزگەھا دھۆکێ د پرێس کۆنفرانسەکی دا ئاشکرا کر کو پێنگاڤ پێنگاڤ ژ پرۆژێ نووژەنکرن و بەرفرھەکرنا نەخۆشخانا ھیڤیی یا زارۆکان ل باژێرێ دھۆکێ یێن دھێنە جێبەجێکرن، ئەڤرۆ قووناغا پێنجێ یا پرۆژێ ھەڤپشک دناڤبەرا ساخلەمیا دھۆکێ دگەل رێکخراوا ساخلەمیا جیھانی ب ھەڤکاریا ئێکەتیا ئۆرۆپا کو پێکڤە ڤی پرۆژەیی جێبەجێ دکەن ھاتە ڤەکرن کو یێ پێکھاتی بوو ژ دووبارە رێکخستنا ھەمی بەشێن نەخۆشخانا ناڤھاتی ب شێوەیەکێ مۆدێرن دگەل گوھۆرینا ئامیرە و تەختێن ھەمان نەخۆشخانە و گۆت: "ھەر د چارچۆڤێ ڤی پرۆژەیی دا پشکا چاڤدێریا چر ژی ل نەخۆشخانا ھیڤی یا زارۆکان ھاتە ڤەکرن کو ب کۆژمێ ٦٢٠ ھزار یۆرۆ ل ڤێ قووناغێ ھاتنە مەزاختن".
ناڤھاتی ئاماژە دا وێ چەندێ کو ھەتا قووناغا چارێ ئەو شیابوون ٢٠% رێژا مرنێ د ناڤ زارۆکان دا کێم بکەن دگەل دەستبکاربوونا ڤێ قووناغێ ئەو د وێ باوەرێ دانە ئەو رێژا ھاتیە دیارکرن دێ گەلەک کێمتر لێ ھێت.
ل دووماھیا ڤی پرێس کۆنفرانسی رێڤەبەرێ گشتی یێ ساخلەمیێ ل پارێزگەھا دھۆکێ گۆت: "کێمبوونا رێژا دەرمانان ل سەرانسەری عیراقێ و ھەرێما کوردستانێ ب گشتی و پارێزگەھا دھۆکێ ب تایبەتی ھەیە، بەلێ وێ چەندێ ناگەھینیت کو دەرمان ب ئێکجاری نەماینە، سەبارەت کێمیا ئۆکسجینێ ژی راستە ل نەخۆشخانا بێدارێ ل قەزا زاخۆ ھندەک کێماسی ھەبووینە، بەلێ بۆ چارەکرنا ڤێ ئاریشێ پشتەڤانیا دارایی ژ لایێ سەرۆکێ حکومەتا ھەرێما کوردستانێ ڤە ھاتیە دابینکرن و ب زووترین دەم ئەڤ ئاریشە دێ ھێتە چارەسەرکرن".
رێوار محەمەد رەشید
