"پێکهاتەیێن دەشتا نەینەوا بەرەف نه‌مانێ نه ل جهێن ڕەسەن"
دەشتا نەینەوا -KDP.info-دەشتا نەینەوا مەلبەند و پێگەهێ ئۆلی و سیاسی یێ پێکهاتەیین ئیراقێ یە. ئەڤ دەشتە نها گهۆرینێن سیاسی و ئابووری و دیموگرافی تێدا روو ددەن، چاڤدێر و گرنگیدەرێن پێکهاتەیان ژی ئەڤێ یەکێ ب ''مەترسی'' دزانن.
ژمارەیا کرستیان و ئێزدییان ل دەشتا نەینەوا بەرەڤ کێمبوونێ چۆیە و ئەو دەڤەرە دبن كۆنترۆلا هێزێن ئیراقی دانە.
نها حەشدا شەعبی و هێزێن ئیراقی كۆنترۆلا وان جهان دکەن و زۆربەیا کرستیانێن ئیراقێ ل دەڤەرێن جودایێن هەرێما کوردستانێ ئاوارەنە.
نەمانا پێکهاتەیان
دەشتا نەینەوا نافچەیەکا دکەڤیتە باکوورێ ئیراقێ و باکوورێ رۆژئاڤایێ باژێرێ مووسلێ، کو ل گۆر ئامارێن نەفەرمی ژمارەیا پێکهاتەیان دناڤبەرا ٥٠٠هەزار بۆ ٧٠٠هەزار کەسان دایە، کو ژ کرستیان و ئێزدی و شەبەک و کاکەیی و بەشەک ژ عەرەبان ژی جهـ گرتیە.
گرنگیپێدەرەکی کاروباروبارێن ئۆل و پێکهاتەیان ڕاگەهاند، ڕەوشا دەشتا نەینەوا بەرەڤ ئالۆزبوونێ ڤە دچیت و پلانێن سیاسی دهێنە جێبەجێکرن.
سامان نووح، بۆ ماڵپەرێ فەرمیی یێ پارتی دیموکراتی کوردستان گۆت: ''نها پێکهاتەیێن دەشتا نەینەوا بەرەڤ نەمانی دچن و چارەنڤیسێ وان بەرەڤ نەمانێ یە، چونکی نها گهۆرینێن دیمۆگرافی دهێنە ڕوودان و خەلک بەرەڤ نەمانێ ڤە دچیت."
دەشتا نەینەوا ژبلی کو قوربانی بیت ژبۆ گرۆپێن توندرەو، قوربانا جوگرافییا خۆیە، کو کەفتییە وان نافچەیێن ئاریشە ل سەر و بوویە جهێ ناکۆکیێن سیاسی.
ناڤهاتی ئەو یەکە ژی گۆت: "بەریا نها ئەمەریکا پرۆژە بۆ دەشتا نەینەوا هەبوو ژبۆ ئەولەهی و ئابووریا وێ دەڤەرێ، بەلێ نها هێزێن ئەمەریکا هیزێن خۆ ڤەکێشان و ئەوروپا ژی هیچ پرۆژەیەک نینە، ژبەر ڤێ یەکێ ژی نها ئێزدی و مەسیحی کۆچ دکەن."
دیار ژی کر: "ئەگەر هەتا دوو سالێن دى بەردەوام بیت، مەسیحی دێ بەرەڤ نەمانێ چن و ژمارەیا ئێزدییان گەلەک کێم بیت و حکوومەتا ئیراقێ ژی بزاڤان دکەن ب هەڤکاریا حەشدا شەعبی کو پێکهاتەیەکی دیارکری بکەتە دەسەلات."
"گەرەکە نها ئەڤ کەیسە ب هەڤبەشی و دوولایەنی و بێ هێز ئەڤ جوگرافیا ئالۆز ب ئاشتیانە بهێتە چارەسەرکرن." نوح وەسا دبێژیت.
کــاروان بــاعەدرى
