خەسرۆ گۆران: سبەی دادگای فیدراڵی وەڵامی سکاڵای پارتی دەداتەوە

 

هەولێر-KDP.info- ئەمڕۆ لایەنەکانی بەشدار لە لیستی ھاوپەیمانیی کوردستانیدا کۆ بوونەوە و بەرپرسی دەزگای ھەڵبژاردنی پارتیش دەڵێ، سبەی دادگای فیدڕاڵی وەڵامی سکاڵای پارتی دەداتەوە و ھیوادارین لە بەرژەوەندیی دەنگدەرانی کورد بێت.

 

خەسرۆ گۆران، بەرپرسی دەزگای ھەڵبژاردنی پارتی، بە ماڵپەڕی فەرمیی پارتی دیموکراتی کوردستانی ڕاگەیاند: "ئەمڕۆ ئێمە وەک لایەنەکانی بەشدار لە ھاوپەیمانیی کوردستانیدا کۆ بووینەوە و کۆبوونەوەکەش تایبەت بوو بە دامەزراندنی سکرتاریەتی لیستی ھاوپەیمانیی کوردستانی و ئامانجەکانی لیستەکە سەبارەت بە دیاریکردنی کاندیدەکان و تۆمارکردنی ھاوپەیمانیی کوردستانی."

 

بەرپرسی دەزگای ھەڵبژاردن گوتیشی: "تا ئێستا بەفەرمی ١٩ لایەنی سیاسی لە ھاوپەیمانیی کوردستانیدا بۆ ھەڵبژاردنی ئەنجومەنی پارێزگاکانی عێراق بەشدارن."

 

گۆران ئاماژەی بۆ ئەوە کرد: "سبەی دادگای باڵای فیدراڵی وەڵامی سکاڵای پارتی دیموکراتی کوردستان دەداتەوە، لەبارەی بێبەشکردنی دەنگدەرانی ئاوارە، کە پێشتر لە ھەمواری یاسای ھەڵبژاردندا بڕیاری لێوە دراوە و پارتیش سکاڵای لە دادگای باڵای فیدڕاڵی تۆمار کردبوو."

 

پەیوەست بە وەڵامی دادگای باڵای فیدراڵی خەسرۆ گۆران دەڵێت: "ئومێدەوارین بڕیاری دادگای باڵای فیدراڵی لە بەرژەوەندیی دەنگدەرانی کورد کۆتاییی بێت."

 

قائید میرۆ