حکومەتا عیراقێ مولزەمە هەیڤانە 420 ملیار دیناران رەوانەیى هەرێمێ بکەت

دهۆک-KDP.info- ئەندامەکێ جڤاتا نوونەرێن عیراقێ سەر ب فراکسیونا پارتى دیموکراتى کوردستان راگەهاند، 14% ژ بوودجەیا هەرێما کوردستانێ چ پەیوەندى ب مووچەیێ فەرمانبەران ڤە نینە و حکومەتا عیراقێ مولزەمە هەیڤانە 420 ملیار دیناران رەوانەیى هەرێمێ بکەت، کۆ ئەڤ کوژمە دگەل داهاتیێ هەرێمێ دێ مووچەیێ فەرمانبەران پێ ئێتەدان.

خواندەک بۆ بودجەیا عیراقێ بۆ سالا 2019ێ، ل جڤاتا نوونەران هاتیە ئەنجامدان و تا نهو بێ دەنگ ماینە، هندرین لەزگین، ئەندامێ جڤاتا نوونەرێن عیراقێ سەر ب فراکسیونا پارتى ڤە بۆ مالپەرێ فەرمیێ پارتى دیموکراتى کوردستان گۆت:" بزاڤێن دئێنە کرن بۆ بودجەیا سالا 2019ێ، شەهێدێن ل هەرێما کوردستانێ هەمان ماف ئیمتیازاتێن شەهێدێن عیراقێ هەبن و ئەگەر بەغدا لسەر سۆزێن خو بیت دێ بۆ ئەڤ سالە مووچەیێن فەرمانبەرێن هەرێمێ ژى دروست بن و لدەمێ خو ئێنە دان".

هندرین لەزگین خویاکر:" 14% ژ بوودجەیا هەرێما کوردستانێ چ پەیوەندى ب مووچەیێ فەرمانبەران ڤە نینە و حکومەتا عیراقێ مولزەمە هەیڤانە 420 ملیار دیناران رەوانەیى هەرێمێ بکەت، کۆ ئەڤ کوژمە دگەل داهاتیێ هەرێمێ دێ مووچەیێ فەرمانبەران پێ ئێتەدان".

ئەندامێ جڤاتا نوونەرێن عیراقێ سەر ب فراکسیونا پارتى دیموکراتى کوردستان ڤە زەلالکر:" حکومەتا عیراقێ کوژمەکێ پارەیى بۆ گەشەپێدانا هەرێما کوردستانێ دابینکریە و ئەڤە ژى دبیت باش بیت، ژبەر گرنگە هەرێمێ سەربەخۆیا خویا ئابۆرى هەبیت".

هندرین لەزگینى ئاخفت:" کوتلەیێن جڤاتا نوونەران لسەر داخوازیێن کوردستانیان بۆچوونێن جودا هەنە و جاران دژى خواستەیێن مللەتێ کوردستانێ نە کۆ هەرێما کوردستانێ ریفراندوم ئەنجامدایە، ب گشتى دگەل دانا هندەک مافێن کوردانە بەلێ د عیراقەکا ئێکگرتیدا".

هەلز عەلى سەلیم