شەشۆ: دوای ئاگادارکردنەوەی حەشدی شەعبی پێشمەرگەکانی ئێزدیخانیان ئازاد کرد

شنگال -KDP.info- فەرماندەی ھێزەکانی پێشمەرگەی ئێزدی گوتی، دوای ئەوەی حەشدی شەعبی ئاگادارکرانەوە پێشمەرگەکانی ئێزدیخانیان ئازاد کرد، بەڵام تا پەکەکە و حەشدی شەعبی لە شنگال بن، ناوچەکە ئارام نابێت.

قاسم شەشۆ، فەرماندەی ھێزی پێشمەرگەی کوردانی ئێزدی، بە ماڵپەڕی فەرمیی پارتی دیموکراتی کوردستان ڕاگەیاند: "دوای ئەوەی شەوی ڕابردوو حەشدی شەعبی ھێرشی کردە سەر پێشمەرگەی ئێزدیخان و ٢٤ کەسی لێ دەستگیر کردن، ئەمڕۆ ئاگادارمانکردنەوە و پێمان گوتن کە تا دەبێ ئازادیان بکەن، بۆیە نیوەڕۆی ئەمڕۆ ئازادیان کردن و ئێستا گەڕاونەتەوە بارەگای خۆیان."

قاسم شەشۆ گوتیشی: "پێویستە چۆن داعش لەناو برا، ئەوھاش پەکەکە و حەشد لە شنگال دەربکرێن، چونکە تا ئەوان لە شنگال بن، ناوچەکە ئارام نابێت، بۆیە پێویستە ھەموو ھەوڵێک بدرێت بە زووترین کات دەربکرێن، ئەگەرنا دۆخەکە بەو شێوەیە بەردەوام دەبێت."

بڵند ئیبراھم