1400 رزگابویێن دەستێ داعشێ هاتینە چارەسەرکرن

 

دهۆک-KDP.info- رێڤەبەرێ گشتیێ ساخلەمیا پارێزگەها دهۆکێ راگەهاند، ئێکەم رزگاربوویا دەستێ داعشێ کچەکا کوردا ئێزیدى بوو، ئەو زولما رزگاربوویا ددەستێ داعشێدا دیتى و ژیانا سەخت تێدا بورین کارتێکرنەکا مەزن لسەر دەروونێ وان کریە، ژبەر هندێ پێدڤی ب چارەسەریا دەروونى یا بەردەوام هەیە ب هاریکاریا جڤاکى و ب پشتەڤانیا خەلکێ دەڤەرێ.

 

پشتى کەفتنا چەندین باژێرێن عیراقێ ددەستێ تیرۆرستێن داعشێداو بەرەڤ سنوورێن هەرێما کوردستانێ هاتین، کو چەندین دەڤەرێن دەرڤەیى ئیدارا هەرێمى کەفتنە دەستێ داعشێ و چەندین خەلکێ قەزا شنگال هاتنە دەستەسەرکرن ژلایێ تیرۆرستان ڤە، پشتى هەولا رزگارکرنا وان رەڤاندیێن ددەستێ داعشێدا، ل سەر راسپاردەیا سەرۆکێ حکومەتا هەرێما کوردستانێ (نیچیرڤان بارزانى) سەنتەرێ چارەسەریێ بۆ رزگاربوویێن دەستێ تیرۆرستێن داعشێ ل دهۆکێ هاتە ڤەکرن، بۆ ڤێ ئێکێ د. نزار عسمەت، رێڤەبەرێ گشتى یێ ساخلەمیا پارێزگەها دهۆکێ بۆ مالپەرێ فەرمیێ پارتى دیموکراتى کوردستان گۆت:" ئێکەم رزگاربوویا دەستێ داعشێ کچەکا کوردا ئیزیدى یا خەلکا دەڤەرا شنگالێ بوو و بزووترین دەم چارەسەریا وێ هاتە کرن و تا نوکە هزار و چوار سەد کچ و ژن هاتنە چارەسەرکرن".

 

رێڤەبەرێ گشتى یێ ساخلەمیا پارێزگەها دهۆکێ زەلالکر:" ل سەنتەرێ ناڤبرى هەمى جورێن چارەسەریا فیزیکى بۆ رزگاربویێن دەستێ داعشێ هاتینە کرن و پتریا وان چارەسەریا دەروونى بووینە ب پشتەڤانیا خو گونجاندنا وان دناڤ جڤاکیدا".

 

د. نزار عسمەت دیارکر:" ئەڤ جورە بزاڤە بۆ وێ ئێکێ بوویە، کو رزگاربوویان پتر باوەڕى بخۆ هەبیت و تێکهەلى جڤاکى بن و ئەم ژى پشتەڤانین و داخوازێ ژ حکومەتا هەرێما کوردستانێ و حکومەتا عیراقا فیدرال دکەین پتر پشتەڤانیا رزگاربوویێن ژدەستێ تیرۆرستێن داعشێ ژلایێ ئابوورى ڤە بکەن، ژبەر رەوشا وان یا ئابوورى یالاوازە".

 

رزگاربوویێن دەستێ رێکخراوا تیرۆریا داعشێ بەهرا پتر ژلایێ دەروونى ڤە د زەرەرمەند بوون، بۆ ڤێ مەرەمێ نزار عسمەت خویاکر:" ئەو زولما رزگاربوویا ددەستێ داعشێدا دیتى و ژیانا سەخت تێدا بورین کارتێکرنەکا مەزن لسەر دەروونێ وان کریە، دیسان ئاوارە بوونێ کارتێکرنەکا خراب بۆ دەروونێ وان لدووڤ خو هێلایە، ژبەر هندێ پێدڤی ب چارەسەریا دەروونى یا بەردەوام هەیە ب هاریکاریا جڤاکى و ب پشتەڤانیا خەلکێ دەڤەرێ"

هەلز عەلى سەلیم