مزگینیا سەرکەفتنا ئیرادا میللەتێ کوردستانێ گەهشتنە بارزان

 

بارزان-KDP.info- چەندین میدیاکار و چالاکڤانێن کورد ژ هەر چوار پارچەیێن کوردستانێ راگەهاند، مە مزگینیا سەرکەفتنا ئیرادا مللەتێ کوردستانێ گەهاندە مەزارێ نەمران ل بارزان و تەڤایا شەهیدێن کوردستانێ، ب خوین و دەنگ دگەل سەربەخویى و دەولەتا کوردستانێ داینە.

 

پشتى 25ێ ئەیلولا ئەڤ سالە، خەلکێ کوردستانێ بەرەڤ سندوقێن دەنگدانێ ڤە چوویى ژبۆ ئەنجامدانا ریفراندۆما سەربەخۆیا کوردستانێ، دەرئەنجامێن بەراهیێ وەک کومسیونا بلندا هەلبژارتن و راپرسیان ل کوردستانێ دایە دیارکرن، رێژەیا دەنگدانێ ب بەلێ (92،73) ژ بۆ سەربەخۆیا کوردستانێ بوویە، کومەکا میدیاکار و جالاکڤانێن دهۆکێ و چەندین گەنجێن هەر چوار پارچەیێن کوردستانێ (باشۆر- باکوور- رۆژهەلات- رۆژئاڤا) سەرەدانا مەزارێ نەمران ل بارزان کر، ژبۆ گەهاندنا پەیاما مزگینیا سەرکەفتنا ئیرادا مللەتێ کورد ژبۆ سەربەخۆیا کوردستانێ.

 

(شێخ خەلات بارزانى)، نوونەرێ سەرۆک (مەسعوود بارزانى) ل مەزارى نەمران ل بارزان، بۆ ماڵپەڕێ فەرمیی پارتى دیموکراتى کوردستان گۆت:" دیرۆکا میللەتێ کورد ب سەدەهان سالان پرى قوربانیدان و دەربەدەرى و زولم و ئەنفال و رەڤین و سیدارادان و بن ئاخا کرنا خەلکێ مەبوویە ژلایێ حکومەت و سیستەمێن جودا جودا ل عیراقێ، ژبەر ڤێ ئێکێ کوردێن باشوور و کوردێن هەمى جیهانێ خوراگرى کریە ژبۆ سەرکەفتن و سەرئێخستنا ئیرادا میللەتى کوردستانێ".

 

(شێخ خەلات بارزانى)، پتر بەحسکر و ئاماژەدا: "سەرکەفتنا ریفراندۆما سەربەخۆیا کوردستانێ، هەمى بنەمایێن دیموکراتیەتى و ئاشتى خوازیێ ل کوردستانێ بۆ جیهانێ دیارکرن، سەرکردایەتیا سیاسى ل کوردستانا باشوور ب سەرپەرشتیا سەرۆک (مەسعوود بارزانى)، هیڤى و ئۆمێدا میللەتێ کوردستانێ و هەمى سەرکردەیێن نەمر و ب تایبەت (مەلا مستەفایێ بارزانى) بجهئینا، پشتى هەمى نەخۆشیان کوردستانیان ب ئیرادە و ب خوین هێزا خۆ نیشا جیهانێ دا، کۆ دڤێت ببنە خودان دەولەتەک سەربەخۆ".

 

(بەدرخان زاویتەیى)، شرۆڤەکەرێ سیاسى و ئێک ژ رێکخەرێن سەرەدانا گرۆپێن جودا بۆ دەڤەرا بارزان خویاکر: "هەر چوار پارچێن کوردستانێ سۆزێن خۆ نووکرنەڤە، کۆ لسەر رێبازا پیرۆزا کوردینێ بەردەوام بن ژبۆ مافێن کورد بەرزە نەبن، مە مزگینیا سەرکەفتنا ریفراندۆما سەربەخۆیا کوردستانێ گەهاندە مەزارێ نەمران ل بارزان و هەمى شەهیدێن کوردستانێ و دەرئەنجامێ وێ بۆ جیهانێ هەمیێ دیارکرن".

 

(زاویتەیى)، پتر ئاخفت و زەلالکر: "کودرستانیان پێنگاڤا ئێکێ بۆ سەربەخۆیا کوردستانێ ب سەرکەفتیانە هاڤێژیت، یا گرنگ دووڤدا دئێت و لسەر ملێن سەرکردایەتیا سیاسى دمینیت، کۆ ب رەنگ دێ کارتێکرنێ ل جیهانێ کەن ژبۆ دامەزراندنا دەولەتا کوردستانێ ل باشوور".

 

هەلز عەلى سەلیم