ھێزەكەی پێشمەرگەی عەرەب لە سنووری رەبیعە و زوممار جێگیر دەكرێن

 

زوممار-KDP.info- بەرپرسێكی پارتی دیموكراتی كوردستان لە زوممار ڕایگەیاند، لە ئێستادا سەرقاڵی جێگیركردنی ئەو ھێزەی پێشمەرگەی عەرەبن كە ماوەیەك پێش ئێستا مەشق و راھێنانیان تەواو كردووە و، دوای ئەوە ھەزار پێشمەرگەی دیكە دەست بە مەشق دەكەن.

(حەسەن خەلۆ)، بەرپرسی ناوچەی پارتی لە زوممار، بە ماڵپەری فەرمیی پارتیی دیموكراتی كوردستانی راگەیاند: "لە ماوەی رابردوودا ھەزار پێشمەرگەی عەرەب مەشق و راھێنانیان تەواو كرد و لە ئێستادا ئەو ھەزار پێشمەرگەیە بەسەر دوو فەوجدا دابەش كراون و، سەرقاڵی دروستكردنی سەربازگەیەكین لە سنووری زوممار، دواتر ھێزەكە بەسەر ناوچەكەدا دابەش دەكەین و خەریكە ئامادەكارییەكان تەواو دەكەین".

(خەلۆ) گوتیشی: "دوای جێگیركردنی ئەو ھێزە لە ناوچەی رەبیعە و زوممار، ھەزار پێشمەرگەی دیكە دەست بە مەشق و راھێنان دەكەن، پاش ئەوانیش ھەزاری دیكەیش مەشق و راھێنان دەكەن، كە دەبنە سێ ھەزار پێشمەرگەی عەرەب".

 

بڵند ئیبراھیم