"پرسی سەرۆكایەتی چارە نەكرێت، لە كۆنتڕۆڵ دەردەچێت"

بەغدا-KDP.info- ئەندامێكی ئەنجوومەنی نوێنەرانی عێراق لە فڕاكسیۆنی پارتی دیموكراتی كوردستان ڕایگەیاند، ئەگەری ئەوە هەیە سبەی ئەنجوومەنەكەیان كۆ ببێتەوە، لەبەر ئەوەی ئەگەر پرسی سەرۆكایەتی چارە نەكرێت، كێشەكان گەورە دەبن و دۆخەكە لە كۆنتڕۆڵ دەردەچێت.

(شاخەوان عەبدوڵڵا)، بۆ ماڵپەری فەرمیی پارتی دیموكراتی كوردستان دەڵێت: "دەنگۆی ئەوە هەیە كە رێككەوتن كراوە بۆ ئەوەی سبەی پەرلەمانتارێكی بێلایەن ئیدارەی دانیشتن بكات و پرسی سەرۆكایەتی پەرلەمان چارە بكرێت، بەڵام لە عێراقدا هیچ شتێك جیددی نییە، هەر بۆیەیش ئەو رێككەوتنەی كراوە، جێی متمانەپێكردن نییە".

(عەبدوڵڵا) گوتیشی: "لە نێوان هەردوولایەنی پەرلەمانی، لە ئێستادا نێوەندگیری هەیە، بۆ ئەوەی رێككەوتن بكرێت و كۆتایی بەو پرسە بهێندرێت، خۆ ئەگەر ئەو كێشانەیش چارە نەكرێن، گەورەتر دەبن و دواتر لە كۆنتڕۆڵی هەموو لایەك دەردەچن و دۆخەكە هەمووی تێكدەچێت، بۆیە باشترە بگەنە رێككەوتن".

باوەڕیشی وایە كە، تا سبەی بگەنە رێككەوتن و ئەو پرسە چارە بكرێت.

 

بڵند ئیبراهیم