ڕاگه‌یه‌ندراوى كۆبوونه‌وه‌ى هاوبه‌شى هه‌ردوو مه‌كته‌بى سیاسیى پارتى و یه‌كێتى
هەولێر-KDP.info- له كۆبوونه‌وه‌ى هه‌ردوو مه‌كته‌بى سیاسیى پارتى دیموكراتى كوردستان و یه‌كێتیى نیشتمانیى كوردستاندا، كه ئه‌مڕۆ 4/4/2016 له هه‌ولێر ساز درا، به‌تا‌یبه‌تى تاوتووى بارودۆخى سیاسى و ڕه‌وشى حكوومه‌تى عیراق كرا و، ئه‌و گۆڕانكارییانه‌ىش كه سه‌رۆكوه‌زیرانى عێراق پێشنیازى كردوون و هه‌وڵى بۆ ده‌دات خرایه به‌ر باسه‌وه و، هه‌ردوولایش له‌سه‌ر ئه‌م خاڵانه‌ى خواره‌وه هاوده‌نگن:
1- كێشه‌ى هه‌رێمى كوردستان و حكوومه‌تى فیدراڵى عێراق ساڵه‌هایه هه‌تا هاتووه قووڵتر بووه‌ته‌وه، بۆیه پێمان وایه ته‌نها به‌م ئاڵوگۆڕانه كۆى كێشه‌كان چاره ناكرێن.
2- پێویسته به ڕاشكاوى ساغ بكرێته‌وه، ئایا پره‌نسیپى شه‌راكه‌تى گه‌لى كوردستان له پێكهێنانى ده‌وڵه‌تى فیدراڵى عیراق ماوه یان نا؟! كه به ڕا و دیدى هه‌ردوو مه‌كته‌بى سیاسى زۆر لایه‌نى ئه‌م شه‌راكه‌ته، پێشێل كراون.
3- هه‌ر گۆڕانكارییه‌ك له داموده‌زگاكانى عێراقى فیدراڵ بكرێت، ده‌بێت پشكى كورد پارێزراو بێت و سه‌ركردایه‌تیى سیاسیى كوردستان نوێنه‌رانى بۆ ئه‌م مه‌به‌سته ده‌ستنیشان ده‌كات.
4- هه‌ردوولا جه‌خت ده‌كه‌نه‌وه كه پشكى هه‌موو حیزبه كوردستانییه‌كان پارێزراو ده‌بێت.
5- هه‌ردوولا به گرینگى ده‌زانن وه‌فدێكى باڵاى كوردستانى به مه‌به‌ستى گفتوگۆ له‌سه‌ر كۆى كێشه‌كان بچنه به‌غدا.
مه‌كته‌بى سیاسیى
پارتى دیموكراتى كوردستان و یه‌كێتیى نیشتمانیى كوردستان
4/4/2016
