سەرۆكایەتیی هەرێمی كوردستان هاوخەمی بۆ بەلجیکا دەربڕی..لەهێڵی یەکەمی شەڕی تیرۆرداین، بۆیە لە دڕاندایەتی تیرۆر تێدەگەین

هەولێر-KDP.info-  سەرۆکایەتی هەرێمی کوردستان، کردەوە تیرۆریستییەكانی شاری بروكسێل سەرکۆنە دەکات و، رایدەگەیەنێ کە گەلی كوردستان خۆی لە هێڵی یەكەمی شەڕی تیرۆریستاندایە زۆر بە باشی لە هەڕەشە و ئاسەوار و دڕندایەتیی تیرۆر دەگات و خۆی بە هاوخەمی گەلی بەلجیكا دەزانێ.

دەقی راگەیاندراوەکە:

سەرلەبەیانیی ڕۆژی سێشەممە 22ـی 3ـی 2016 لە ئەنجامی چەند كردەوەیەكی تیرۆریستیی لە شاری بروكسێلی پایتەختی بەلیجیكا ژمارەیەكی زۆری هاووڵاتیی بێتاوان گیانیانلەدەست داوە و ژمارەیەكیشیان بریندار بوون.

زۆر بە توندی ئیدانەی ئەو كردەوە قێزەوەنانە دەكەین كە ئاسوودەیی و ژیانی خەڵكیان كردۆتە ئامانج. بەم بۆنە خەمناكەوە سەرەخۆشیی لە گەل و حكوومەتی بەلجیكا و كەسوكاری قوربانیان دەكەین و هیوای چاكبوونەوە بۆ برینداران دەخوازین.

گەلی كوردستان كە خۆی لە هێڵی یەكەمی شەڕی تیرۆریستاندایە زۆر بە باشی لە هەڕەشە و ئاسەوار و دڕندایەتیی تیرۆر دەگات و خۆی بە هاوخەمی گەلی بەلجیكا دەزانێ. كردەوە تیرۆریستییەكانی شاری بروكسێل زەنگی مەترسییە بۆ جیهانیان و ئەوە دەسەلمێنێت كە تیرۆر سنوور ناناسێت و هەڕەشەیە بۆ كۆی مرۆڤایەتی. هەر بۆیەش ڕووبەڕووبوونەوە و لەناوبردنی تیرۆر هەوڵێكی جیددی و هەمەلایەنە و یەكگرتوویی كۆمەڵگەی نێودەوڵەتی پێویستە.

سەرۆكایەتیی هەرێمی كوردستان
22ـی 3ـی 2016