سەلیم ئەلجبوری، هەڵوێستی خۆی لەدژی حەشدی شەعبی راگەیاند
بەغدا-KDP.info- سەرۆكی ئەنجومەنی نوێنەرانی عێراق ڕایگەیاند بۆ پرۆسەی ئازادكردنی هەر ناوچەیەك، بەشداریی ڕۆڵەكانی ئەو ناوچانە لەپێشترن.
لە دیمانەیەكدا لەگەڵ ڕۆژنامەی شەرق ئەوسەت سەبارەت بە دوایین بارودۆخی عێراق و ناوچەكە، سەلیم ئەلجبوری، سەرۆكی ئەنجومەنی نوێنەرانی عێراق ڕایگەیاند بەشداریكردنی ڕۆڵەكانی هەر ناوچەیەك لەپێشترە بۆ بەشداریكردن لە پرۆسەی ئازادكردنەوەی ناوچەكانی خۆیان و پاككردنەوەیان لە گرووپی تیرۆریستیی داعش.
ئەوەش وەڵامێكی سەرۆكی پەرلەمانی عێراق بوو بۆ بەرپرسانی حەشدی شەعبی لە ئۆپەراسیۆنی ئازادكردنەوەی مووسڵ و ناوچەكانی دیكەی پارێزگای نەینەوا كە پێشتر لەلایەن ئەنجومەنی ئەو پارێزگایەوە جەخت لەسەر ئەوە كرابووەوە نابێت حەشدی شەعبی كە لەلایەن ئێرانەوە پاڵپشتی دەكرێت، بەشداری پێ بكرێت لە ئازادكردنەوەی مووسڵ، و مەترسیی ئەوەیان دووپات كردبووەوە كە بوونی ئەو چەكدارانە لە مووسڵ و ناوچەكانی دەورەبەری دەبێتە هۆی ناكۆكی و نانەوەی كێشەی تائیفی لە ناوچەكە.
