پارتی لە سلێمانی، گەرمیان و هەڵەبجە لە پۆستەكان بێبەش كراوە

 

هەولێر-KDP.info-  كارگێڕی لقی ١٢ـی پارتی دیموكراتی كوردستان، رەخنە لە بێبەشكردنی پارتی دەگرێت لە پۆستەكانی پارێزگای سلێمانی و دەڵێت، پارتی بووەتە قوربانیی رێككەوتنی گۆڕان و یەكێتی و ئیسلامییەكان.

 

(فارووق عەبدولكەریم)، بە ماڵپەری فەرمیی پارتی دیموكراتی كوردستانی راگەیاند: "پارتی لە سنووری پارێزگای سلێمانی غەدرێكی زۆری لێ كراوە و لە پۆستەكانی ئەو پارێزگایە بێبەش كراوە، هەروەها لە گەرمیانیش هیچ پۆستێكی پێ نەدراوە و، لە پارێزگاری هەڵەبجەیش پارتی بووەتە قوربانیی رێككەوتنی گۆڕان و یەكێتی و ئیسلامییەكان".

 

 (عەبدولكەریم) گوتیشی: "دەبووایە پارتی دیموكراتی كوردستان بە قەبارەی دەنگ و قورسایی خۆی مامەڵەی لەگەڵدا بكرابایە، چونكە حزبێك لە ئاستی كوردستان یەكەم بێت، چۆن دەكرێت لە حكوومەتی خۆجێیی بێبەش بكرێت، لە كاتێكدا ئێمە لە سنووری پارێزگای سلێمانی رێژەیەكی بەرچاو دەنگمان هێناوە و متمانەی خەڵكمان بەدەست هێناوە، چۆن دەكرێت بێباكانە كار بۆ دوورخستنەوەی پارتی لە حكوومەتی خۆجێییدا بكرێت".

 

ئەو كارگێڕەی لقی 12ـی پارتی دەیشڵێت: "سەرجەم نیگەرانییەكانی كادرانی پارتی لە سنووری پارێزگای سلێمانی دەگەیێنینە بەرزترین ئاست، چونكە لایەنەكانی بەرانبەر پێشێلی رێككەوتنەكەیان كردووە، لە كاتێكدا لە مەكتەبی سیاسیی حزبەكانیش قسەی لەسەر كرابوو".

 

كارزان سەباح هه‌ورامی