5هه‌زار خێزان چوونه‌ته‌وه دەڤەری شنگال
دهۆك-KDP.info- بەرپرسی کاروباری ئێزدییەکان لە بەڕێوەبەرایەتی ئەوقافی پارێزگای دهۆک، ڕایگەیاند، تیرۆریستانی داعش لە ناوچە ئێزدینشینەکاندا 42 مەزارگە و نیشانەی ئێزدییەکانیان تەقاندووەتەوە و لەناو براون؛ دوای ئازادکردنی شنگال زیاتر لە 4900 خێزان گەڕاونەتەوە شنگال و دەوروبەری.
)هادی دوبانی) بەرپرسی کاروباری ئێزدییەکان لە بەڕێوەبەرایەتی ئەوقافی پارێزگای دهۆک بە ماڵپەڕی فەرمیی پارتیی دیموکراتی کوردستان گوتی: "دوای هاتنی داعش لە مانگی 8ـی ساڵی 2014 بۆ شنگال و دەوروبەری 42 مەزارگە و نیشانەی کوردانی ئێزدی لەناو براون و خراپ کراون."
گوتیشی: "لەو شارە زیاتر لە هەموو شوێنەکانی دیکە مەزارگە و نیشانەکانی ئێزییەکان لەناو براون، لەگەڵ ئەوەیش چەند ناوچەیەک ماون ئازاد بکرێن؛ دوای ئازادبوونی ئەو ناوچانە بە دیار دەکەوێت کە تیرۆریستانی داعش چەند مەزارگە و نیشانەی ئێزدییەکانیان لەناو بردووە.
) دوبانی) ئەوەشی گوت: "دوای ئازادکردنی شنگال و دەوروبەری زیاتر لە 4هەزارو900 خێزانی شنگالی کە ئاوارەی دهۆک و ناوچەکانی دیکە ببوون، گەڕاونەتەوە سنوونێ، خانەسۆرێ و سەر چیای شنگال."
بەرپرسی کاروباری ئێزدییەکان لە بەڕێوەبەرایەتی ئەوقافی پارێزگای دهۆک، دەیشڵێ: "چاوەڕێ دەکەین دوای گەرمداهاتنی کەشوهەوا و ئاوەدانبوونەوەی ناوچەکە، ئاوارەکان زیاتر بگەڕێنەوە سەر ماڵوحاڵی خۆیان."
ڕابین شێروانی
