حكوومه‌ت بۆ فه‌رمانبه‌ران: مافه‌كانتان نافه‌وتێت
هه‌ولێر-KDP.info- حكوومه‌تی هه‌رێمی كوردستان، له راگه‌یه‌ندراوێكدا به‌بۆنه‌ی هاتنی ساڵی نوێ، په‌یامێكی پیرۆزبایی ئاراسته‌ی گه‌لی كوردستان كرد و، له‌و راگه‌یه‌ندراوه دا، حكوومه‌تی هه‌رێمی كوردستان وێڕای ئاراسته‌كردنی پیرۆزبایی له هێزی پێشمه‌رگه، رایگه‌یاند، به‌هۆی هه‌ڕه‌شه‌كانی داعش، ساڵی 2015 ساڵێكی پڕ له نه‌هامه‌تی بوو. ئاماژه‌ییشی دا وێڕای شه‌هیدبوونی ژماره‌یه‌ك رۆڵه‌ی كورد، به‌ڵام سه‌ركه‌وتنی گه‌وره به‌سه‌ر تیرۆریستان تۆماركراوه. له په‌یامه‌كه دا، حكوومه‌تی هه‌رێمی كوردستان، سه‌باره‌ت به دواكه‌وتنی مووچه، رایگه‌یاندووه مافی هیچ كه‌سێك نافه‌وتێت و ئه‌وان له هه‌وڵه‌كانییان بۆ چاره‌كردنی قه‌یرانی دارایی هه‌رێمی كوردستان، به‌رده‌وام ده‌ن.
ده‌قی راگه‌یه‌ندراوه‌كه:
هاووڵاتیانی خۆشەویستی كوردستان
بەبۆنەی ساڵی تازەی زایینیەوە، گەرمترین پیرۆزباییتان ئاراستە دەكەین بەو هیوایەی ساڵی تازە ببێتە ساڵی خۆشی و سەقامگیری زیاتری وڵاتەكەمان.
هاوكات پیرۆزبایی لە پێشمەرگە قارەمانەكانی سەنگەری شەرەف و فیداكاری و خانەوادەی سەربەرزی شەهیدانی رێگای خەباتی كوردایەتی دەكەین و دووپاتیشی دەكەینەوە رۆلەكانیان هەمیشە لەیادن و ئەوان هەردەم سیمبوڵی ئازادی و سەقامگیری كوردستانن.
ساڵی 2015، ساڵێكی پڕ لە نەهامەتی بوو بۆ گەلی كوردستان بەهۆی هەڕەشە بەردەوامەكانی تیرۆریستانی داعش بۆ سەر هەرێمی كوردستان و شەهیدبوونی چەندین رۆڵەی نەبەرد و قارەمانی ئەم وڵاتە، هەروەها بەهۆی بەردەوامبوونی قەیرانی ئابووری سەپێندراو بەسەر هەرێمەوە لەلایەن حكوومەتی بەغداوە ، ئەمە جگە لە لێكتێنەگەیشتنى سیاسی نێو هەرێمی كوردستان و ئەو ئاڵۆزیانەی بەدوایدا هات.
بەڵام لە هەمان كاتیشدا ساڵی تۆماركردنی چەندین سەركەوتنی گەورە و مەزن بوو لەبەرەكانی جەنگ و ساڵی رزگاركردنی بەشێكی زۆری خاكی داگیركراوی كوردستان بوو لەلایەن تیرۆریستانی داعشەوە، بە هیممەت و فیداكاری پێشمەرگە قارەمانەكانی كوردستان.
هیوادارین لە ساڵی 2016ـدا بتوانین بەسەر هەموو گرفت و قەیرانەكاندا زاڵ بین و ئەم ساڵە ببێتە ساڵی سەركەوتنی تەواو بەسەر تیرۆر و تیرۆریستان و تەواوبوونی گرفت و قەیرانەكانی هەرێمی كوردستان.
هەر لێرەشەوە بە ئێوەی ئازیزی رادەگەیەنین، حكومەتی هەرێمی كوردستان لە هەوڵی بێ وچانی خۆی بۆ چاره‌كردنی هەموو گرفتەكان بەردەوام دەبێت و دڵنیاتان دەكەینەوە لەوەی كە هیچ مافێكی ئەم خەلكە نافەوتێ.
هاوكات سوپاس و پێزانینی خۆمان و رێزی بی پایانمان بۆ وڵاتانی دۆست و هاوپەیمان رادەگەیەنین، بۆ پاڵپشتیكردنی پێشمەرگە و یارمەتیدانی گەلی كوردستان لە شەڕی دژی تیرۆریستانی داعش و گەڕاندنەوەی سەقامگیری بۆ هەرێمی كوردستان و سەركەوتن بەسەر تیرۆریستان و ئازادكردنی بەشێكی زۆری ئەو خاكەی كە لە ژێر دەستی تیرۆریستاندا بوو.
دیسانەوە ئەو پەڕی رێزمان بۆ خۆڕاگری گەلی كوردستان لەم بارودۆخەدا دووپات دەكەینەوە و بێگومانین لەوەی وەك چۆن ئەم گەلە گرفتی قورستری تێپەڕاند، ئەم گرفتەش تێدەپەڕێنێت.
