سه‌رۆك بارزانی و جێنشینی ئه‌بوزه‌بی، بیروڕایان بۆ رووبه‌ڕووبوونه‌وه‌ و ڕیشه‌كێشكردنی تیرۆر ئاڵوگۆڕ كرد

ئه‌بوزه‌بی-KDP.info-  (شێخ محەمەد بن زاید ئال نهیان) جێنشینی ئەبوزەبی و جێگری فەرماندەیی باڵای هێزە چەكدارەكانی دەوڵەتی ئیمارات پێشوازی لە (مەسعوود بارزانی) سەرۆكی هەرێمی كوردستان كرد و له‌دیداره‌كه‌دا جەخت لە فراوانتركردنی پێوەندی و دۆستایەتیی نێوان هەر دوولا كرایەوە.

لەچوارچێوەی سەردانەی فەرمییەكەی سەرۆك بارزانی بۆ ئیماراتی یەكگرتووی عەرەبی ڕۆژی یەكشەممە 29ـی 11ـی 2015 لە شاری ئەبوزەبی شێخ محەمەد بن زاید ئال نهیان جێنشینی ئەبوزەبی و جێگری فەرماندەیی باڵای هێزە چەكدارەكانی دەوڵەتی ئیمارات پێشوازی لە مەسعوود بارزانی سەرۆكی هەرێمی كوردستان كرد.

لە دیدارەكەدا باس لە پێشڤەچوون و سەركەوتنەكانی پێشمەرگەی كوردستان لەدژی تیرۆریستانی داعش كرا و هەروەها بیروڕا لەبارەی ڕێگەكانی ڕووبەڕووبوونەوە و ڕیشەكێشكردنی تیرۆر لە ئاستی ناوچەیی و جیهانیدا ئاڵوگۆڕ كرا.

هەر لەم دیدارەدا دوا پەرەسەندنە سیاسییە هەرێمایەتی و دەولییەكان خرایە بەر باس و گفتوگۆ و پەیوەندییە سیاسی و ئابوورییەكانی نێوان هەرێمی كوردستان و ئیماراتی یەكگرتووی عەرەبی تاوتوێ كرا و جەخت لە فراوانتركردنی پەیوەندی و دۆستایەتیی نێوان هەر دوولا كرایەوە.