داعشەكانی شنگال بەرەو مووسڵ رادەكەن.. دەزانن ئازادكردنی نزیك بووەتەوە
شنگال-KDP.info- فەرماندەیەكی هێزی پێشمەرگەی شنگال دەڵێت، تیرۆریستانی داعش زۆر لاواز بوون و لە ئێستادا جوڵەیان زۆر كەم بووە، لە ترسی پێشمەرگەیش بەرەو بەعاج و تەلەعفەر و ناوچەكانی دیكەی سەر بە مووسڵ ڕادەكەن.
عەمید (عێزەددین سەعدۆ) فەرماندەی هێزی پێشمەرگە لە شنگال، بە ماڵپەری فەرمیی پارتیی دیموكراتی كوردستانی راگەیاند: "ماوەی چەند رۆژێكە فڕۆكە جەنگییەكانی هاوپەیمانان بە بەردەوامی تیرۆریستانی داعش بۆردوومان دەكەن و زیانی زۆر زۆریان پێ گەیاندوون كە بە دەیان تیرۆریست كوژراون و بریندار بوون و زیانی زۆری ماددییشیان پێ گەیاندوون".
(سەعدۆ) گوتیشی: "لە ئێستادا تیرۆریستانی داعش لە شنگال زۆر لاواز بوون و جوڵەیشیان زۆر كەم بووە، چونكە لە هەر شوێنێك جوڵەیان هەبێت، بۆردوومان دەكرێن و لەناو دەبردرێن".
دەشڵێت، بە هۆی ئەوەی لە ناوچەكە لاواز بوون و بە بەردەوامی لێیان دەكوژرێن و دەزانن ئازادكردنی شنگال نزیك بووەتەوە، تیرۆریستان بەرەو بەعاج و تەلەعفەر و ناوچەكانی دیكەی سەر بە مووسڵ، ڕادەكەن.
بڵند ئیبراهیم
