وه‌زیری ده‌ره‌وه‌ی سوێد: هاتووین تا پاڵپشتیی خۆمان بۆ هه‌رێم له هه‌موو روویه‌كه‌وه رابگه‌یه‌نین
هه‌ولێر-KDP.info- له‌دیداریاندا له‌گه‌ڵ سه‌رۆكوه‌زیرانی كوردستان هه‌ردوو وه‌زیری ده‌ره‌وه و به‌رگری سوێد مه‌به‌ستی سه‌ردانه‌كه‌یان بۆ هه‌رێم خسته‌ڕوو و، وه‌زیری ده‌ره‌وه‌ی سوێد رایگه‌یاند، هاتوون پاڵپشتیی بۆ هەرێمی كوردستان لە هەموو ڕوویەكەوە ڕابگەیەنن و ئامادەییی خۆیشی بۆ هەر هاوكارییەك پیشان دا. ده‌یشڵێ كه ئەفسەرانیان لە هەرێمی كوردستان لەسەر مەشقكردن بەهێزی پێشمەرگە بەردەوام دەبن و خۆشحاڵیی خۆیشی پیشان دا كە ئەمڕۆ خۆیان لەنێو دۆستەكانیاندا لە هەرێمی كوردستان دەبیننەوە.
ئێوارەی ئەمڕۆ دووشەممە 1/11/2015 (نێچیرڤان بارزانی) سەرۆكوەزیرانی هەرێمی كوردستان، پێشوازی لە خاتوو مارگۆت واڵسترۆم وەزیری دەرەوە و پیتەر هۆڵتكڤێست وەزیری بەرگریی سوێد و شاندێكی یاوەریان كرد.
لە دیدارێكدا كە قوباد تاڵەبانی جێگری سەرۆكوەزیران و ژمارەیەك لە وەزیرانی حكوومەتی هەرێمی كوردستان ئامادەی بوون، شاندی میوان خۆشحاڵیی خۆیان بە سەردانی هەرێمی كوردستان دەربڕی و ئاماژەیان بەوە دا كە پێویست بوو زۆر زووتر ئەو سەردانە ئەنجام بدەن، بەڵام دەرفەتی سەردان بۆ هەرێمی كوردستان ئێستا ڕێككەوت، هەروەك باسیان لە سەركەوتنە یەك دوای یەكەكانی هێزی پێشمەرگە لە دژی تیرۆر كرد و نەبەردی و ئازایەتیی پێشمەرگەیان بەرز نرخاند كە بەرگری لە هەرێمی كوردستان و هەموو جیهان دەكات.
خاتوو واڵسترۆم دەربارەی مەبەستی سەردانەكەیان بۆ هەرێمی كوردستان، ئاشكرای كرد كە ئەوان هاتوون پاڵپشتیی خۆیان بۆ هەرێمی كوردستان لە هەموو ڕوویەكەوە ڕابگەیەنن و ئامادەییی خۆیان بۆ هەر هاوكارییەك پیشان دا. دووپاتیشی كردەوە ئەفسەرانیان لە هەرێمی كوردستان لەسەر مەشقكردن بە هێزی پێشمەرگە بەردەوام دەبن و خۆشحاڵیی خۆیشی پیشان دا كە ئەمڕۆ خۆیان لەنێو دۆستەكانیاندا لە هەرێمی كوردستان دەبیننەوە.
لای خۆیەوە سەرۆكوەزیرانی هەرێمی كوردستان سوپاسی ئەو سەردانە گرنگە و تێبینییە بەنرخەكانی شاندی میوانی كرد و دووپاتی كردەوە كە خەڵك و حكوومەتی هەرێمی كوردستان پەیوەندییەكی تایبەتیان لەگەڵ خەڵك و حكوومەتی سوێد هەیە و سوپاسی خۆی و حكوومەتی هەرێمی كوردستانی بۆ ئەو هاوكارییانە دەربڕی كە تا ئێستا لەلایەن سویدەوە پێشكەش بە هەرێمی كوردستان كراون. هەروەك سوپاسی خەڵك و حكوومەتی سوێدی كرد كە لە كاتە سەختەكاندا و كاتێك ژمارەیەكی زۆری خەڵكی كوردستان ڕوویان لەو وڵاتەكە كرد، باوەشیان بۆ كردنەوە و بە باشترین شێوە پێشوازییان لێ كردن.
سەبارەت بە پەیوەندیی دوولایەنەش، جەختی لەوە كردەوە كە خەڵك و حكوومەتی هەرێمی كوردستان ئامادەن بۆ پەرەپێدانی پەیوەندییەكان لە هەموو بوارەكاندا، هەر هاوكاری و هەماهەنگییەك پێشكەش بكەن و بەردەوامیش دەبن لە پتەوتركردنی ئەو پەیوەندیانە. تاوتوێكردنی بارودۆخی عێراق و ناوچەكە بە گشتی، لایەنێكی دیكەی دیدارەكە بوو0
