ڕێبەرى وەرگرتنى قوتابیان لە زانکۆکان دابەش کرا
هەولێر-KDP.info- دواى دوو ڕۆژ لە گەیشتنى ئەنجامەکانى قۆناغى پۆلى ١٢ ئامادەیى بۆ وەزارەتى خوێندنى باڵا و توێژینەوەى زانستى، ڕاستەوخۆ دەست کرا بەدابەشکردنى ڕێبەرى وەرگرتنى خوێندکاران لە زانکۆ و پەیمانگەکان بەسەر پەروەردەى گشتیى پارێزگاکان بۆ ئەوەى لە ڕێگەى قوتابخانەکانەوە بەسەر خوێندکاراندا دابەش بکرێت.
لەو چوارچێوەیەدا وەزارەتى خوێندنى باڵا و توێژینەوەى زانستى داوا لە خوێندکاران قوتابیان دەکات بە وردى رێبەرى وەگرتن بخوێننەوە بۆ ئەوەى لە کاتى پڕکردنەوە و پێشکەشکردن فۆرم بۆ زانکۆلاین هەڵە نەکەن و، ڕێنماییەکان بە وردی بخوێنە‌وە و لەبەرچاوی بگرن. چونکە زۆر گرنگە هەڵبژاردنەکانت لەگەڵ ئارەزوو و بارى تەندروستى و تواناى زانستیت بگونجێت. وەرگیرانت لە هەر خوێندنێک بە لەبەرچاوگرتنی ئارەزوو و باری تەندروستی و توانای زانستیت مانای ئەوەیە، کە تۆ هێڵە گشتییەکانى دواڕۆژى خۆت دیارى کردووە.
لە ڕێبەرى وەرگرتندا مەرجە گشتی و تایبەتەکانی وەرگرتنى خویندكاران لە زانکۆكانی هەرێم و ڕێنماییەکانى گواستنه‌وه و دابه‌زینی خوێندنی قوتابیان/خویندكاران لە زانکۆكانی هەرێمی كوردستان و چۆنیەتى پێشکەشکردنی فۆرمی زانكۆ لاین و خشته‌ی زانكۆ‌كانی هه‌رێمی كوردستان بۆ ساڵی خوێندنی (2015-2016) و هێمای قوتابخانه‌كان/خوێندنگەكان تیادا خراوەتەڕوو.
سەبارەت بە وادەى کاراکردنى (زانکۆ لاین)، (عەباس ئەکرەم) گوتەبێژى وەزارەتى خوێندنى باڵا و توێژینەوەى زانستى ڕاگەیاند: دواى گەیشتنى ئەنجامەکانى دەرچووانى پۆلى (١٢)ى ئامادەیى لەلایەن وەزارەتى پەروەردە بۆ وەزارەتەکەمان، ڕاستەوخۆ دەست کرا بە پڕۆسەى وردبینیکردن لە ناوەکانى دەرچووان و خوێندنگەکان بەمەبەستى دڵنیابوون لە ناوى دووبارە و نەهێشتنى کەموکوڕى لە لیستەکاندا، لە ئێستاشدا پڕۆسەى وردبینیکردن کۆتایى هاتووە.
گوتەبێژى وەزارەتى خوێندنى باڵا و توێژیبنەوەى زانستى ئاشکرایشی کرد: لەئێستادا دەست کراوە بە دانانى (یوزەرنەیم و پاسۆرد) بۆ سەرجەم دەرچووانى پۆلى دوانزەى ئامادەیى بۆ ئەوەى دواى کاراکردنى (زانکۆ لایەن) خوێندکاران و قوتابیان بتوانن بچنە ناو سیستەمى (زانکۆ لاین) و فۆرمى وەرگرتن لە زانکۆ و پەیمانگەکان پڕ بکەنەوە.
سەبارەت بە کاتى کاراکردنى زانکۆلاین (عەباس ئەکرەم) ڕایگەیاند: دواى دانانى یوزەرنەیم و پاسۆرد بۆ سەرجەم خوێندکارانى دەرچوو، کە وەزارەتەکەمان لە ڕێگەى پەروەردەى گشتیى پارێزگاکان و خوێندنگەکان ڕەوانەى خوێندکاران و قوتابیانى دەکات، وێب سایتى (زانکۆ لاین) بۆ دەرچووانى دوانزەى ئامادەیى کارا دەکرێت و، وەک ئاگادارییەکیش لە دەزگاکانى راگەیاندنیش بۆ دەرچووان بڵاو دەکرێتەوە.
