پەکەکە موختاری گوندی زارگه‌لیی ئازاد كرد
سۆران-KDP.info- دوای تێپه‌ڕبوونی 5 رۆژ، موختاری گوندی زارگه‌لی، له‌لایه‌ن پارتیی كرێكارانی كوردستانەوە ئازاد كرا.
(سیروان رۆژبه‌یانی) قایمقامی شارۆچكه‌ی رواندز بۆ ماڵپه‌ڕی فه‌رمیی پارتیی دیموكراتی كوردستان گوتی: دوای ئه‌وه‌ی رۆژی شه‌ممەی ڕابردوو په‌كه‌كه 3 له خه‌ڵكی گوندی زارگه‌لی ده‌ستگیر كرد، پاش دوو رۆژ دوو كه‌س ئازاد كران، به‌ڵام (ئیسماعیل زارگه‌لی) کە موختاری گونده‌كه بوو ئازاد نه‌كرا، بەڵام بە هه‌وڵ و ماندووبوونێكی زۆر دواجار پاش 5 رۆژ لە دەستبەسەرکردنی، موختاری گونده‌كه‌یش ئازاد كرا.
گوتیشی: ده‌ستگیركردنی ئه‌وانه له‌سه‌ر ئه‌وه بووه كه ئه‌وان داوایان له په‌كه‌كه كردبوو بنكه و باره‌گاكانی خۆیان له گونده‌كه ببه‌نه ده‌ره‌وه، به‌ڵام ئه‌وان هێشتا ئاماده نین ئەو کارە بکەن، چونكه وه‌ك خه‌ڵكی ناوچه‌كه ئاماژه‌ی بۆ ده‌كه‌ن، هه‌بوونی بنكه و باره‌گاكانی په‌كه‌كه ژیانی ئه‌وانی ناخۆش كردووه و، هەر کاتێک تێکهەڵچوون لە نێوانیاندا دێتە ئاراوە، خەڵکی ئەوان دەبنە قوربانی.
رابین شێروانی
