سه‌رۆكایه‌تی هه‌رێم پاڵپشتی بۆ هه‌نگاوه‌كانی چاكسازی له عێراق ده‌ربڕی..پێویستە ئەم پڕۆسەیە ڕەچاوی ئیستحقاقات و بەشداریی هه‌رێم بكات
هه‌ولێر-KDP.info-گوته‌بێژی سه‌رۆكایه‌تی هه‌رێمی كوردستان له‌راگه‌یاندراوێكدا سەبارەت بە داواكاریی سەرۆكوەزیرانی عێراق و بڕیاری ئەنجوومەنی وەزیرانی عێراقی فیدڕاڵ بۆ دەستپێكردنی پڕۆسەی چاكسازی لە دامودەزگا كارگێڕی و میرییەكان، پاڵپشتی سه‌رۆكایه‌تی هه‌رێمی كوردستانی بۆ هه‌رهه‌نگاوێك به ئاراسته‌ی چاكسازی ده‌ربڕی و راشیگه‌یاند كه" پێویستە ئەم پڕۆسەیە ڕەچاوی ئیستحقاقات و بەشداریی هەرێمی كوردستان و لە هەمانكاتیشدا ڕەچاوی نوێنەرایەتیی پێكهاتە ئایینی و نەتەوەییەكانی عێراقیش بكات و كاریگەریی لەسەریان نەبێت.
ده‌قی لێدوانی گوتەبێژی سەرۆكایەتیی هەرێمی كوردستان:
سەبارەت بە داواكاریی سەرۆكوەزیرانی عێراق و بڕیاری ئەنجوومەنی وەزیرانی عێراقی فیدڕاڵ بۆ دەستپێكردنی پڕۆسەی چاكسازی لە دامودەزگا كارگێڕی و میرییەكان، سەرۆكایەتیی هەرێمی كوردستان پشتگیری هەموو هەنگاوێك دەكات كە بە ئاراستەی چاكسازی و نەهێشتنی كەموكوڕییەكان لە دامودەزگاكانی دەوڵەت دەنرێت.
بۆ ئەوەی پڕۆسەی چاكسازی سەركەوتوو بێت پێویستە ئەم پڕۆسەیە ڕەچاوی ئیستحقاقات و بەشداریی هەرێمی كوردستان و لە هەمانكاتیشدا ڕەچاوی نوێنەرایەتیی پێكهاتە ئایینی و نەتەوەییەكانی عێراقیش بكات و كاریگەریی لەسەریان نەبێت. هەروەها لە چوارچێوەی دەستوور و سیاقی ئیداریشدا ئەنجام بدرێت.
گوتەبێژی فەرمیی سەرۆكایەتیی هەرێمی كوردستان
9ـی 8ـی 2015
