وه‌زاره‌تی په‌روه‌رده: به وردی سه‌یری په‌ڵپی قوتابیان ده‌كرێ
__2015_07_30_h21m18s7__LB.jpg)
هه‌ولێر-KDP.info- گوتەبێژی وەزارەتی پەروەردەی حکوومەتی ھەرێمی کوردستان ده‌ڵێ، تیمەکانمان شەو و رۆژ کار له‌سه‌ر پەڵپی قوتابیان دەکەن و، قوتابیانیش دڵنیا دەکەنەوە کە ھەر یەکێک پەڵپی گرتبێت بە وردی تەماشای دەکەن و بەدواداچوون بۆ ھەموو سەرنجەکانیان دەکه‌ن.
گوتەبێژی وەزارەتی پەروەردەی حکوومەتی ھەرێمی کوردستان (فاتیح مەولەویزادە) بە ماڵپەڕی فەرمیی پارتیی دیموکراتی کوردستانی راگەیاند: قوتابیان دڵنیا دەکەینەوە کە ھەر یەکێک پەڵپی گرتبێت بە وردی تەماشای دەکەین و بەدواداچوون بۆ ھەموو سەرنجەکانیان دەکرێت.
(مەولەویزادە) ده‌یشڵێت، چەند رۆژێکە سەرەڕای ئەوەی کە پشووی تیمەکانە، بەڵام شەو و رۆژیان کردووه‌تە یەک و ساڵانە کە بۆ ئەم مەبەستە قوتابیان پەڵپیان دەگرت تەنھا کۆی نمرەکان تەماشا دەکرا، بەڵام ئەمساڵ بەھۆی گۆڕینی شێوازی تاقیکردنەوەکان و بەکارھێنانی پەڕەی سۆمۆ، بەدواداچوون و سەرنجی کۆی پەڕەکان دەدرێت.
ئاماژه‌یشی دا، ھەر کەسێک مافی خۆی وەردەگرێت و سیستەمەکە لەخزمەت قوتابیانە و دادپەروەرانە پره‌نسیپە زانستی و ھونەرییەکان جێبەجێ دەکرێت.
گوتەبێژی وەزارەتی پەروەردەی حکوومەتی ھەرێمی کوردستان ڕوونیشی کردەوە، یەکەمەکانی کوردستان ھەموو دەنگۆ و قسەڵۆکەکانی ئەوانەی کە خوازیاری شڵەژانی باری دەروونیی قوتابیان بوون رەواندەوە، بۆیە دووبارە ھەموولایەک دڵنیا دەکەینەوە ھەر قوتابییەک ماف و نمرەی خۆی وەردەگرێت.
جێی ئاماژەیه، لە کۆی یەک ملیۆن و820ھەزار پەڕەی سۆمۆ پەڵپ لە زیاتر 20ھەزار پەڕە وەرگیراوە، ئەمەش سەرکەوتنی پرۆسەکە دەگەینێت.
بڵند ئیبراھیم
