حکوومەتی هەرێم جه‌ژنی سەری ساڵی له خوشك و برایانی ئێزدی پیرۆز کرد
هەولێر-KDP.info-سبه‌ینێ چوارشه‌ممه 16ی نیسانی 2015 جه‌ژنی سه‌رساڵ، "چارشه‌مبوا سۆر"ی كوردانی ئێزدییه، به‌م بۆنه‌یه‌وه ئه‌نجومه‌نی وه‌زیرانی هه‌رێمی كوردستان برووسكه‌یه‌كی ئاراسته‌ی خوشك و برایانی ئیزدی كرد.
ئەمەیش دەقی بروسکەکەیە
ئیسال د ده‌مه‌كێدا جه‌ژنا سه‌رسالێ "چارشه‌مبوا سۆر" یا خوشك و برایێن مه یێن كوردێن ئێزدی ڤه‌دگه‌ڕیت، كو ب هه‌زاران مالباتێن وان ژبه‌ر تیرۆرێ ژ وار و جهـ و مال و حالێن خوه دوورن و ژیانا ئاواره‌ییێ ده‌رباز دكه‌ن، هه‌روه‌ها ب هه‌زارێن دن ژی هاتنه بێسه‌روشوونكردن، شه‌هیدكرن و ڕه‌ڤاندن. ئه‌م ژ دل و جان ههڤسۆزی و هه‌ڤخه‌میا خوه دگه‌ل خوشك و برایێن مه یێن ئێزدی ده‌ردبڕین و هیڤیدارین كو جه‌ژنێن بێن، جه‌ژنێن سه‌ركه‌تن، ڕزگاربوون و ئازادكرنا هه‌موو جهێن كوردستانێ ب گشتی و جهـ و وار و ده‌ڤه‌رێن خوشك و برایێن ئێزدی ب تایبه‌تی بیت.
د ده‌مه‌كێدا كو ئه‌م سه‌رسالێ ل هه‌موو خوشك و برایێن ئێزدی ل كوردستانێ و ل هه‌ر جهه‌كێ جیهانێ بن، پیرۆز دكه‌ین، جاره‌كا دی هه‌موویان پشتڕاست دكه‌ین كو حكوومەتا هەرێما كوردستانێ دێ ل سه‌ر هه‌ولێن خوه یێن ژبۆ ناساندنا كاره‌ساتا ئێزدیان وه‌ك جینۆساید ب هه‌ر ئاوایی به‌رده‌وام بیت و ژبۆ ڤێ یه‌كێ دێ هه‌موو كارین و شیان و كه‌نالێن خوه یێن سیاسی و دیپلۆماسی ب كار ئینیت.
حكوومه‌تا هه‌رێما كوردستانێ هه‌روه‌ها ب هه‌ر ئاوایی دێ ل سه‌ر هه‌ولێن خوه یێن ڕزگاركرنا خوشك و برایێن مه یێن ئێزدی یێن ڕه‌ڤاندی به‌رده‌وام بیت هه‌تا هه‌موو تێنه ئازادكرن. هه‌روه‌ها ژی دێ د هه‌ولێن به‌رده‌وامدا بیت ژبۆ پێشكه‌شكرنا هه‌موو ته‌رزێن هاریكاری و خزمه‌تگوزاریان و ئاڤه‌دانكردنا وان جهـ و ده‌ڤه‌رێن وان یێن كو ڕۆژانه ژئالیێ پێشمه‌رگێن كوردستانێڤه تێنه ڕزگاركرن.
ههڤسۆزی یا هه‌ڤخه‌می یا خوه دگه‌ل هه‌موو خوشك و برایێن مه ئێزدی دووباره دكه‌ین و جه‌ژنا هه‌موویان پیرۆز بیت.
جڤاتا وه‌زیرێن هه‌رێما كوردستانێ
14.4.2015
