بنگەهێ لالش: خەتیرێن ئاگرێ نەورۆزێ دێ نەحەزێن كوردان شەوتینن
دیارە كوردستان نها درۆژانێن جەژنا نەورۆزێ را دەرباز دبت، كو ئەڤ جەژن ژی دیرۆكا گەلەكی دوپات دكەت كو بەرەڤانی و خۆراگریەكا بەردەوام كرینە و زۆرداری ل سەر خۆ قەبول نەكرینە لەواژی قوربانی بەردەوام داینە.
خەتیرا نەورۆزێ هێمایێ رۆناهی و راستیێ و سەركەفتنا خێرێ یە ل سەرتاریێ،لەوا ژی دوژمنێن گەلێ كورد ددرێژاهیا دیرۆكێ دا هەولداینە ڤی مللەتی بندەست بكەن،ومێژوو شاهیدە كو هەركەسێ هەولدایی ئیرادا گەلێ كوردستانێ بشكینت چارەنڤیسێ وێ بەرەڤ نەمانێ چۆیە و هێزا وی شكەستی یە.
ئاشكرایە كوردێن ئێزدی هەرسال وەكو هەر كوردەكی جەژنا نەورۆزا نەمر ساخ دكرن،ژبەركو پەیڤا نەورۆز دپیرۆزترین تێكستێن ئاینێ ئێزدیان دا هاتیە ئەو ژی (بەیتا بوهارێ)یە،هەر دیسان پەیڤا كوردستان بخۆ ژی دبەیتا ئاینی یا پیرۆزدا (بەیتا شەرفەدین ) دا هاتیە،وئەڤ چەندە رەسەنایەتی و ورەه و ریشالێن كەڤنار یێن ئێزدیان دسەلمینت كو گرێدانا وان ب ئاخ و نەتەوا وان یا كوردی ڤە ئاخا باب و كالێن وانە.
بێ گومان گێرانا ئاهنگێن نەورۆزێ ل ئەڤ سالە جیاوازە ژسالێن بۆری ژبەر وی َهێرشا هۆڤانەیە ب سەر گەلێ مەدا هاتی ژبال تیرۆرستێن داعش ڤە،كو چەندین دەڤەرێن مە داگیركرین و ژوانا ژی شنگالا خۆشتڤی.
ئەم دبێژین و د وێ باوەریێ ژی دانە ب سایا پێشمەرگەیێ قارەمان و ب سەركردایەتیا سەرۆك بارزانی هەر بۆستەكا ئاخا كوردستانێ مابت دێ ژدەستێن داعش ئێتە رزگاركرن و ئەڤ هۆڤێن داعش دێ ئێنە دەرخستن بەرامبەر چ قوربانیدان بت، چونكی گەلێ كوردستانێ ئێدی زۆرداریێ قەبول ناكە،هەر وەكو كاوەیێ ئاسنگەر زۆرداری قەبول نەكری و خەتیرا ئازادیێ بلند كری.
خەتیرَێن نەورۆزا نەمر دی َهەر مینن رۆژناهیەكا گەش بۆ رێكا ئازادیێ وسەرفەرازیا گەلێ كوردستانێ و دێ ئاگرەكی دژوار بت بۆ هەموو نەحەزێن كوردستانێ،چونكی مللەتێ كورد تم دڤێت پێنگاڤا بەرەڤ ئاڤاكرنێ پاڤێژن و دەستكەفتان ب دەست بینن ئەوژی ب سایا سیاسەتا حەكیمانەیا جەنابێ سەرۆك بارزانی و ب هاریكاریا پێشمەرگەیێ قارەمان.
هیڤیدارین ئاهنگێن نەورۆزێ ببنە رۆناهیەكا گەش ژبۆ ئازادكرنا وان دەڤەرێن داگیرگری و ژوانا ژی دەڤەرێن ئێزدیان و ئازادكرنا وان كەچ و ژنێن ئێزدیان یێن تا نها دبن كونترۆلا هۆڤێن داعش دا،داكو خەلكێ مە جارەكان ڤەگەرتە سەر مال و حالێ خۆ و ژیانەكا سروشتی دەربازبكن.
ل سەر مە پێتڤی یە ئەم رێكێ نەدەینە دوژمنێن گەلێ كورد بێ ئۆمێدیێ ددلێ مەدا بچینین، لەوا گەرەكە ئەم بەردەوام ئاهنگێن نەورۆزێ ساخ بكن.
ل ڤێرێ ژی سەرێ رێز و نەوازشێ بۆ تەڤایا پێشمەرگەیێن شەهید و خێزانێن وان دچەمینین و دهەمان دەمدا داخوازا سلامەتیا ب لەز بۆ بریندارێن خۆ دكەین.
جارەكادن جەژنا نەورۆزێ ل خەلكێ كوردستانێ و سەرۆكاتیا هەرێمێ و پەرلەمان و حكومەتا كوردستانێ پیرۆز دكەین .
شێخ شامۆ
سەرۆكێ دەستەیا بلندا بنگەهێ لالش
دهۆك/20/3/2015
