سەرۆكی هەرێمی كوردستان داوا لە لایەنەكان دەكات پابەندی ڕێككەوتنی دهۆك بن

هەولێر-KDP.info-  گوتەبێژی فەرمیی سەرۆکایەتیی هەرێمی کوردستان رایگەیاند کە، سەرۆكی هەرێمی كوردستان داوا لە هەموو لایەنەكان دەكات پابەندی ڕێككەوتنی دهۆك بن و بەرژەوەندیی بەرزی گەل و نیشتیمان بپارێزن.

دەقی لێدوانی گوته‌بێژی‌ فه‌رمیی سه‌رۆكایه‌تیی هه‌رێمی كوردستان:
به‌رده‌وام هه‌وڵه‌كانی (سەرۆك بارزانی) و سه‌رۆكایه‌تیی هه‌رێمی كوردستان به‌و ئاراسته‌یه‌ بووه‌، كه‌ هه‌موو كورد پێكه‌وه‌ له‌ یه‌ك به‌ره‌ دابێت. به‌ تایبه‌تی له‌ ڕۆژئاوای كوردستانیش (سەرۆك بارزانی) ویستوویەتی و كاری بۆ ئەوە كردووە هه‌یئه‌تێكی یه‌كگرتوو هەبێت كە هه‌موو هێز و لایه‌نه‌ سیاسییه‌كان بۆ خزمه‌تی زیاتری به‌رژه‌وه‌ندییه‌كانی كوردستان لە دەوری یەكتر كۆ بكاته‌وه.
له‌ بنه‌ڕه‌ته‌دا‌ ڕێككه‌وتنی هه‌ولێر بۆ ئه‌و مه‌به‌سته‌ بوو، به‌ڵام لایه‌نێك جێبه‌جێی نه‌كرد. پاشان ڕێككه‌وتنی دهۆكیش ده‌رفه‌ت و ئومێدێكی دیكه‌ بوو به‌و ئامانجه‌ی هه‌موو لایه‌نه‌كان پێكه‌وه‌ و به‌ یه‌ك گوتار و یه‌ك هه‌ڵوێست خزمه‌ت به‌ دۆز و هیوای گەلەكەمان له‌ ڕۆژئاوا بكه‌ن. بەردەوامیش سەرۆكایەتیی هەرێمی كوردستان لایەنە سیاسییەكانی ڕۆژئاوای بۆ جێبەجێكردنی ڕێكەوتنی دهۆك هان داوە و، هەوڵیشی داوە هەڵبژاردنەكان بە یەكەوە و بە بەشداریی هەموو لایەك ئەنجام بدرێت.
بەڵام‌ ئه‌م هه‌نگاوەی ئێستا لە ژێر ناوی هەڵبژاردنی شارەوانییەكانی جەزیرە لە ئارادایه تاكلایەنەیە و بە پێچەوانەی ڕێكەوتنی دهۆكە و ئەم هەنگاوە و هه‌ر هه‌نگاوێكی دیكه‌ی تاكلایه‌نه‌ خزمه‌ت به‌ دۆزی كورد و دیموكراسی ناكات و مایه‌ی قبوڵ كردن نییه‌.
جارێكی دی بەڕێز سەرۆكی هەرێمی كوردستان داوا لە هەموو لایەنەكان دەكات پابەندی ڕێككەوتنی دهۆك بن و بەرژەوەندیی بەرزی گەل و نیشتیمان بپارێزن.

د. ئومێد سه‌باح
گوته‌بێژی  فه‌رمیی سه‌رۆكایه‌تیی هه‌رێمی كوردستان
13ـی 3ـی 2015