حکوومەت: با یادی ڕاپەڕین، ورە و وزەی زیاترمان بۆ خواستی نەتەوەیی پێببەخشێت

هەولێر-KDP.info-حکوومەتی هەرێمی کوردستان لە بەیاننامەیەکدا بەبۆنەی راپەڕینی مەزن بروسکەیەکی پیرۆزبای ئاراستەی تێکڕای کوردستانیان کرد و لەپەیامەکەیدا هاتووە، با یادی ڕاپەڕین، ورە و وزەی زیاترمان پێ ببەخشێت بۆ خۆڕاگری و پارێزگاری لە ئیرادە و خواستی نەتەوەییمان.

دەققی بەیاننامەی ئه‌نجوومه‌نى وه‌زیران

جەماوەری سەربەرز و خۆڕاگری کوردستان..
هاووڵاتیانی خۆشەویست..

ئەمڕۆ لە ساتەوەختێکی هەستیار و مێژووییدا، بیست و چوار ساڵ بەسەر ڕاپەڕینە مەزنەکەی ئازارى ١٩٩١ی گەلەکەماندا تێدەپەڕێت، ساتەوەختێک کە كوردستانیان لە سەنگەری بەرگریدا بەرامبەر بە دڕندەترین هێزی تاریکی دەجەنگێ، لە لایەکی دیکەشەوە ڕووبەڕووی فشارێکی زۆری دارایى و سیاسی و جەنگی دەروونی بوونەتەوە.

ڕاپەڕین کە گەورەترین دەربڕین بوو لە خواست و ئیرادەی كوردستانیان بۆ ئازادی و ڕەتکردنەوەی دەسەڵاتی دیکتاتۆری و هەژموونی خۆسەپاندن بەسەر ئیرادەی نەتەوەیی و نیشتمانیماندا، بۆ ئێمه‌ هەڵگری چەندین مانا و وانەی بەنرخە، کە گرنگترینیان زەروورەتی یەکگرتووییمانە، لەگەڵ هەبوونی ئیرادەی خۆڕاگری و ڕۆحی بەرەنگاربوونەوە و بەرخۆدان، لەپێناوی سەربەستی و سەربەرزیدا.

كوردستانیانى خۆشەویست..

گیانی خۆڕاگری و بەرەنگاریی ئێوە، به هەمان ڕۆحییەتی ڕاپەڕینە مەزنەکەمانەوە بەرامبەر بەو جەنگە نەگریسەی داعش لە لایەک و ئەو دۆخه‌ سه‌خته‌ى لە لایەکی دیکەوە ڕووبەڕووی هەرێمى كوردستان بوونەتەوە، گەورەترین بەڵگەی دڵسۆزیتانە بۆ خاک و نیشتمان و وەفاداریتانە بۆ خوێنی شەهیدە نەمرەکانمان. ئەم هەڵوێستە، درێژەپێدەر و شێوازێکی دیکەی خەباتی ڕەوای گەلەکەمانە، هاوشانی خەباتی سیاسی و دیپلۆماسی و بنیادنان و ئاوادانکردنەوەی کوردستان. بە دڵنیاییشەوە سەرکەوتن هەر بۆ ئەم گەلە ئازادیخوازەیە، کە ئێستا لەسەر ئاستی جیهان خاوەن ناوبانگێکی بەرز و دۆستانێکی زۆرە.

لەم یاده‌ پیرۆزەدا، گه‌رمترین پیرۆزبایی ئاراستەی سەرجەم خانەوادەی سەربەرزی شەهیدانی ڕێگای ڕزگاری و پێشمەرگە قارەمانەکانمان و سەرجەم هاووڵاتیانی خۆڕاگر و سەربەرزی کوردستان و ته‌واوى خوشک و برایانمان لە پارچەکانی دیکەی کوردستان و تاراوگە، ده‌كه‌ین.

با یادی ڕاپەڕین، ورە  و وزەی زیاترمان پێ ببەخشێت بۆ خۆڕاگری و پارێزگاری لە ئیرادە و خواستی نەتەوەییمان.
بەرز و شکۆدار بێت یادی ڕاپەڕینە مەزنەکەی گەلەکەمان..

نەمری و سەربەرزی بۆ شەهیدانی ڕاپەڕین و سەرجەم شەهیدانی ڕێگای ئازادی و سه‌رفرازیى کوردستان..
ئه‌نجومه‌نى وه‌زیرانى هه‌رێمى كوردستان
4-3-2015