دهۆك.. دەست بە كۆكردنەوەی كۆمەك بۆ ئاوارەكانی شنگال و زوممار كرا

دهۆك-kdp.info- ئەمڕۆ خەڵكی پارێزگای دهۆك دەستیان بە كۆكردنەوەی كۆمەك بۆ برا ئاوارەكانی شنگال و زوممار كرد كە هاوكارییەكەیش لە كەلوپەلی خواردەمەنی و پێداویستییەكانی دیكە پێك هاتبوو.

پارێزگاری دهۆك بە وەكالەت، ئەمڕۆ لەگەڵ رێكخراوەكانی كۆمەڵگەی مەدەنی و رێكخراوی یوئێن لە سنووری پارێزگای دهۆك كۆ بووەوە و تێیدا باس لە ڕەوشی دەڤەری شەنگال و زوممار و ئاوارەبوونی هاووڵاتیان بۆ ناوچەكانی پارێزگای دهۆك و چۆنیەتیی هاریكاریكردنیان كرا.

پارێزگاری دهۆك بە وەكالەت (بەهزاد عەلی ئادەم)، داوای لە رێكخراوەكانی كۆمەڵگەی مەدەنی و یوئێن كرد كە ڕەوشی نالەباری ئاوارەكان بگەیەننە شوێنی مەبەست و هەرچی زووە هاریكاریی خەڵكی لێقەوماو بكەن تا ژیان و گوزەرانیان باشتر بكرێت.

پاش گفتوگۆكردن لەبارەی چۆنیەتیی گەیاندنی هاوكارییەكان بۆ ئاوارەكان بە تایبەتی ئەوانەی كە لە كەمپەكاندا نیشتەجێ كراون، رێكخراوەكانی بەشدار لە كۆبوونەوەكەدا ئامادەیی خۆیان بۆ هەر هاریكارییەك پێشان دا بە تایبەت بۆ ئاوارەكانی نیشتەجێی كەمپەكان.

لە لایەكی دیكەوە و هەر ئەمڕۆ، لە لایەن خەڵكی پارێزگای دهۆكەوە دەست بە كۆكردنەوەی كۆمەك بۆ برا ئاوارەكانی شنگال و زوممار كرا كە هاوكارییەكەیش لە كەلوپەلی خواردەمەنی و پێداویستییەكانی دیكە پێك هاتبوون.

لەو بارەیەوە ئەندامی پەرلەمانی كوردستان و بەرپرسی كۆكردنەوەی كۆمەكەكانی پارێزگای دهۆك مەلا (ئەنەس دۆسكی) بۆ kdp.infoگوتی، "ئەمڕۆ لە بەردەرگەی قەزای ناوەندیی دهۆك دەست بە كۆكردنەوەی كۆمەك بۆ ئاوارەكانی شنگال و زوممار كرا و داوایش لە خەڵكی دهۆك و دەوروبەری دەكەین كە بە هەموو تواناوە هاریكاریی ئەو برا ئاوارانە بكەن و بە تایبەت بە دابینكردنی كەلوپەلی پێویست و خواردن و خواردنەوە بەشداری لەو كۆمەكییەدا بكەن تا بە زووترین كات بگەیەندرێتە ئاوارەكان".

گوتیشی" ،پێویستە خەڵكی دهۆك وەكو ئەركێكی ئایینی، نیشتمانی و نەتەوەیی هاریكاری و یارمەتییەكان كۆ بكەنەوە، تا هەرچی زووە بگەیەندرێتە دەستی برا ئاوارەكانمان".

دڵدار ئیبراهیم