دهوك.. پتر ژ 730 هزار دولار بو بشته‌ڤانیكرنا پێشمه‌رگه‌ی هاتینه كومكرن
__2014_07_08_h18m55s53__BA.jpg)
دهوك-KDP.info- جێگرێ پارێزگه‌ری دهوكی دیاركر، كو ب هاریكاریا ئێكه‌تیا به‌لینده‌ران وژورا بازرگانی یا دهوكێ پتر ژ (730 ) حه‌فت سه‌دوسی هزار دولار، هاتینه كومكرن و ب وی كوژمێ پاره‌ی پێدڤیێن پێشمه‌رگه‌ی ل به‌روكێن به‌ره‌ڤانیكرنێ ل محوه‌رێ روژئاڤایێ دیجله و محوه‌رێ باشیكێ هاتینه دابینكرن.
ئه‌ڤرو جێگرێ پارێزگه‌رێ دهوكێ سه‌رپه‌رشتیا كومبونه‌كێ دگه‌ل لیژنا كومكرنا هاریكاریا بو پێشمه‌رگه‌ی كر و، دكومبونێدا به‌حسێ كارێ لیژنێ و به‌رده‌وامیا كومكرنا هاریكاریا و كرینا پێدڤیێن پێشمه‌رگه‌ی ل به‌روكێن به‌ره‌ڤانیكرنا سنورێن هه‌رێما كورستانێ بگشتی هاته كرن، پاشان به‌رهه‌ڤبوییان كار و چالاكیێن لیژنێ به‌رچاڤكرن، پاشان ژی پرێسكونفرانسه‌ك هاته سازكرن و جێگرێ پارێزگه‌رێ دهوكێ و ئه‌ندامێن لیژنێ، پتر رونكرن دانه سه‌ر وان هاریكاریێن هاتینه كومكرن و مه‌به‌ستێن مه‌زاختنا وی پارێ هاتیه كومكرن.
دپرێسكونفرانسێ روژنامه‌ڤانی دا جێگرێ پارێزگه‌ری دهوكی (به‌هزاد علی ئاده‌م) دیاركر، كو ب هاریكاریا ئێكه‌تیا به‌لینده‌ران و ژورا بازرگانی یا دهوكێ (730 ) حه‌فت سه‌دو هزار دولار و(800) دولار و(26) ملیون (600) هزار دینار هاتینه كومكرن وب وی كوژمێ پاره‌ی پێدڤیێن پێشمه‌رگه‌ی ل به‌روكێن به‌ره‌ڤانیكرنێ ل محوه‌رێ روژئاڤایێ دیجله و محوه‌رێ باشیكێ هاتینه دابینكرن.
هه‌روه‌سا جێگرێ پارێزگه‌ری دهوكی ئاماژه دا رولێ فه‌رمانگه‌هێن ئه‌ندازیاری یێن پارێزگه‌هێ كو به‌رده‌وام هاریكاریا ب ئامیره‌تێن فه‌رمانگه‌هێن خو هاریكاریا پێشمه‌رگه‌ی دكه‌ن و سوپاسیا هه‌موو لایه‌نان كر كو هاریكاری یا پێشمه‌رگه‌ی دكه‌ن.
به‌هزاد علی ئاده‌م ئاشكه‌را ژی كر، كو ئه‌ڤ پشته‌ڤانیه ب ئه‌ركه‌كێ نه‌ته‌وه‌یی ونیشتمانی ل قه‌له‌مدا وخواست كو خه‌لكێ مه ژی به‌رده‌وام هاریكاریا پێشمه‌رگه‌ی بكه‌ن چونكه دده‌مێن ته‌نگاڤییان دا جڤاكێ سڤیل دشێت رولێ خو یێ نیشتمانی ونه‌ته‌وه‌ی باشتر ببینیت.
دلدار ئیبراهیم
