شیعەیش پێکهەڵپژان.. لە شەڕی مەرجەع و هێزە ئەمنییەکاندا 45 کەس کوژران
هەولێر-KDP.info- سەرچاوە ئەمنییەکانی عێراق دەڵێن، لە شەڕ و پێکدادانی نێوان هێزە ئەمنییەکان و شوێنکەوتووانی مەرجەعی شیعە لە کەربەلا، 45 کەس لە هێزە ئەمنییەکان و شوێنکەوتووانی (سەرخی) کوژراون و دووبەرەکییش کەوتووەتە نێوان گرووپە شیعەکانیشەوە.
ئەفسەرێکی وەزارەتی ناوخۆی عێراق و شایەتحاڵیش بە ڕۆیتەرزیان ڕاگەیاندووە، پێکدادان ئەو کاتە دروست بوو کە هێزەکانی پۆلیس و سەربازانی سوپا هەوڵیان دا مەرجەعی شیعەکان لە کەربەلا(مەحموود سەرخی ئەلحەسەنی) لە نیوەشەوی چوارشەممەدا دەستگیر بکەن.
(سەرخی) و چەکدارە شوێنکەوتووەکانیشی پێشتر لەگەڵ هەریەک لە هێزەکانی ئەمەریکا، هێزە ئەمنییەکانی عێراق و لایەنگرانی (عەلی سیستانی)-دا بەرەوڕوو بوونەتەوە.
هێزەکانی عێراق دەڵێن، ویستوویانە (سەرخی) دەستگیر بکەن، پاش ئەوەی کە چەکدار و شوێنکەوتووانی لەو گەڕەکەی کە (سەرخی) لێی دەژی، بازگەیان داناوە.
(سەرخی) لە پێگە ئەلیکترۆنییەکەی، لەم هەفتەیەدا پەیامێکی داوە و تێیدا، فەتوای (عەلی سیستانی) داوەتە بەر ڕەخنە، کاتێک داوای کرد کە عێراقییەکان شانبەشانی هێزە ئەمنییەکان بەرەوڕووی سوننە توندڕۆکان ببنەوە.
(سیستانی) پاش ئەوەی چەکدارانی بەناو دەوڵەتی ئیسلامی لە عێراق و شام شوێنگەلێکیان لە باکوور و ڕۆژئاوای عێراق دەستبەسەردا گرت، ئەم فەتوایەی دا.
دەوڵەتی ئیسلامی لە عێراق و شام ناسراو بە داعش، پاش دەستبەسەرداگرتنی چەند ناوجەیەکی سوننەنشین، ناوی گرووپ یان ڕێکخراوەکەیان بۆ دەوڵەتی ئیسلامی گۆڕی و پەیمانیشیان بە سەرکردەی گرووپەکە(ئەبوبەکر بەغدایی) دا و کردیان بە خەلیفەی موسڵمانانی جیهان.
سەرچاوەکان دەڵین، پۆلیس و چەکدارانی سوپا، چواردەوری ماڵی (سەرخی)-یان دا و پاش شەش سەعات لە شەڕکردن، دەرکەوت کە (سەرخی) لە شوێنی خۆی نەماوە و ڕای کردووە. دەربارەی زیانە گیانییەکانی شەڕیش گوتی، 5 ئەفسەر و 40شوێنکەوتووی (سەرخی) کوژراون.
