دهێتە خواستن پارێزگەها دهۆكێ خزمەتگوزارییان بۆ خەلكێ ناوچەیێن كوردستانی پێشكێش كەت
دهۆك-kdp.info- پارێزگەرێ دهۆكێ ل گەل لژنا بەرهنگاریا گرفتاریان كۆم بوو كو پێك دهێت ژ چەند فەرمانگەهێن خزمەتكاری و لایەنێن دییێن پەیوەندیدار ل سنۆرێ پارێزگەها دهۆكێ، د كۆمبوونێ جێگرێ پارێزگەری (بەهزاد عەلی ئادەم) بەحسێ رەوشا نوكە یا دەڤەرێ و ئەو قەیرانێن ڤێ دووماهیێ چێبووین وەكو یا پانزینێ و هاتنا ئاواران و رزگاربوونا دەڤەرێن كوردنشین و ئەو بارگرانیا كەتیە سەر پارێزگەهێ و چاوانیا دەربازبوون ژ ڤێ رەوشێ كر.
پاشان پارێزگەرێ دهۆكێ (فەرهاد ئەمێن ئەترووشی) لدورڤێ كۆمبوونێ بو سازیێن راگەهاندنێ دیار كر، كو ئەو دەڤەرێن بەری نوكە دگۆتنێ دەڤەرێن مادێ 140 هەموو هاتنە ب سەر هەرێما كوردستانێ‌ڤە و پشكا مەزن ژ وان دەڤەران هاتینە سەر سنۆرێ پارێزگەها دهۆكێ.
پارێزگەهێ دهوكێ ئاشكەرا ژی كر، دهێتە خواستن كو كارگێریا پارێزگەها دهۆكێ ب هەموو شیانێن خوە كار بكەت و هەموو خزمەتكاریان بۆ خەلكێ وان دەڤەران بگەهینیتیێن ساخلەمی و پەروەردەیی و خزمەتێن دییێن گرێدایی ژیانا وەلاتیان و خواست كو هەر فەرمانگەهەكا پەیوەندیدار بەرهەڤیێن خوە بكەت و د بیاڤێ تایبەتمەندیا خوە دا خزمەتێ بۆ خەلكێ مە ل وان دەڤەران بكەت و پشتەڤانیا پارێزگەهێ نیشا دا بۆ هەر هاریكاریەكێ.
هەر دیسان دتەوەرەكێ دن دا پارێزگەرێ دهوكێ بەحسێ هاتنا هەیڤا رەمەزانا پیروز كر و تەكەز كر و گوت بلا هەیڤا رەمەزانێ ببیتە هەیڤا لێبوورین و پێكڤەژیانێ و هاریكاریكرنا هەژاران و ئاوارە و خێزانێن پێشمەرگەی، پاشان هەر رێڤەبەریەكێ شیانێن خو نیشان دان بو هاریكاریكرنا خەلكێ وان دەڤەران.
دڵدار ئیبراهیم
