پارێزگاری دهوكێ: هەر بازرگانەكێ بشێت پەنزینێ بینیتە هەرێمێ بلا سەرەدانا پارێزگەهێ بكەت

دهۆك-kdp.info- ل جڤاتا پارێزگەها دهوكێ كومبوونەك ب ئامادەبوونا سەروكێ جڤاتا پارێزگەهێ وچەند ئەندامێن جڤاتێ و لیژنا سوتەمەنیێ و خودانێن پانزینخاناندا هاتە ل دارخستن، دكومبونێدا ل بەراهیێ سەروكێ جڤاتا پارێزگەهێ (فەهیم عەبدوڵڵا) بەحسێ قەیرانا پانزینێ كر و ئەو پێرابونێن پارێزگەها دهوكێ ئەنجامداین بو كونترولكرنا قەیرانێ و رێكخستنا بەلاڤكرنا وێ وداخاز ژهەموو لایەنان كر پتر دهاریكار بن دا پانزین باشتر بهێتە بەلاڤكرن.

هەروەسا پارێزگەرێ دهوكێ (فەرهاد ئەمین) بو سازیێن راگەهاندنێ گۆت، قەیرانا پانزینێ ناهێتە جوداكرن ژ قەیرانێن دن یێن سیاسی ل عیراقێ و كارتێكرنا خو دكەتە سەر بوارێن دن ژی یێن ئابووری و بازرگانی وجڤاكی و ئاماژە دا وان پێرابونانیێن حكوومەتا هەرێمێ و پارێزگەها دهوكێ ئەنجامداین بو سڤكرناڤێ قەیرانێ ل سەر وەلاتیان و دیار كر كو یا فەر هەر وەلاتییەك ل دوڤ شیانێن خو یێ هاریكار بیت دگەل دەستهەلاتێ دا قەیران بهێتە چارەسەركرن. هەروەسا دیار كر كو هەر كەسەك یان خودان پانزینخانەك سەرپێچییەكێ بكەت دێ ل دووڤیاسایێ هێتە سزادان.

 

هەروەسا پارێزگەرێ دهوكێ سوپاسیا دەزگەهێن ئێمناهیێ و وەلاتیان و خودانێن پانزیخانان كر كو دهەڤكاربوینە بو بەلافكرنا پانزینێ و خواست ئەڤ هەڤكاریە پتر بهێتە كرن ورێك ل هەموو لایەن وكەسا بهێتە گرتن ئەوێن دڤێن سرایا ترومبێلا تێك بدەن دا هەموو خەلك ب ساناهی بەهرا خو وەرگرن.

دیسان پارێزگەرێ دهوكێ ژبو چارەسەركرنا قەیرانێ پانزینێ ل پارێزگەها دهوكێ و پشتی دەركەفتنا رێنماییان ژلایێ وەزارەتا سامانێن سرووشتیا حكوومەتا هەرێما كوردستانێڤە كارگێریا پارێزگەها دهوكێ داخوازێ ژ هەمی بازرگانێن سنورێ پارێزگەهێ و هەر كەسەكێ شیانێن ئینان و دابینكرنا پانزینا بازرگانی لدویڤ رێنمایان هەبن دشێت سەرا كارگێریا گشتی ل پارێزگەها دهوكێ بدەت ژ بو زانینا رێنمایان بو ئینانا پانزینا بازرگانی پێخەمەت كێمكرنا قەیرانا پانزینێ و نەهێلانا سرایێن درێژێن ترومبیلان لسەر جادان.

 

دڵدار ئیبراهیم