كەمال قڵێجدارئۆغڵو: جەهەپە پشتگیری لە قۆناخی چارەسەریی پرسی كورد دەكات
هەولێر-KDP.info- سەرۆكی گشتیی جەهەپە، كەمال قڵێجدارئۆغڵو گوتی، جەهەپە جەهەپەی پێشوو نییە و بەوپەڕی هێز و توانای خۆیەوە پشتگیری لە قۆناخی چارەسەریی پرسی كورد دەكات.
سەرۆكی گشتی پارتی گەلی كۆماری ( جەهەپە) كەمال قڵێجدارئۆغڵو لە میانیبەشداریكردنی لە كۆڕبەندی دیاڵۆگی دیجلە لە دیاربەكر، گوتارێكی پێشكەش كرد و گوتی: "جەهەپە وەكو جەهەپەی پێشوو نییە، جەهەپەی نوێ بەوپەڕی هێز و توانای خۆیەوە پشتگیری لە قۆناخی چارەسەریی پرسی كورد لە توركیا و هەموو پرسەكانی دیكە بە رێگای ئاشتییانە و دیالۆگ دەكات."
قڵێجدارئۆغڵو هەروەها ئاماژەی بەوە كرد كە پێویستە هەوڵ بدرێت قۆناخی چارەسەریی پرسی كورد و دانوستانەكانی ئەو قۆناخە بخرێنە چوارچێوەیەكی یاساییەوە و هەر دوولا لە چوارچێوەی یاساییدا بە شێوەیەكی شەفاف و كراوە دانوستانەكانیان بۆ چارەسەركردنی ئەو پرسە درێژە پێ بدەن.
ناوبراو گوتیشی كە تا ئێستا جەهەپە بۆ چارەسەركردنی پرسی كورد و پرسەكانی دیكەی توركیا چەندین پێشنیاز و پڕۆژەی پێشكەش كردووە، بەڵام پارتی دەسەڵاتدار پێشوازی لەو پێشنیازانە نەكردووە و بە شێوەیەكی یەك لایەنە هەڵسوكەوتی كردووە.
هیوا ئەردەلان
