ئاستێ پارتی دهەلبژارتنێن پەرلەمانێ كوردستانێ

د.عەلی حسێن بلانی

بێگومان پارتی خودان دیروكەكا زێرینە و سەربورەكا پر بهایە و گرانیا پارتی دزڤریت بو هندێ كو شیایا ببتیە تاكە حزبەكا نمونەیی د مێژویا خەباتا گەلێ كورد دا، چ ب خەباتا جەكی و تڤەنگێ بیت چ ب خەباتا هزر و بیر و دیالوكا سیاسی بیت، و گەشاتیە پاشەروژا پارتی ژی هەر بو وێ چەندێ دزڤریت زێدە باری نوویبونا بەردەوام و خو پێشئێخستنا بێ سنور د هەمی بوارێن ژیانا روژانە دا، كو ئەڤرو پارتی بوویە مینا ئاڤ و هەناسا ل دەڤ جەماوەرێ خوە.

هەر دەم پارتی حزبەكا جەماوەری بوویە و پیروزیا پارتی بو جەماوەرێ وێ دزڤریت، لەوما پاراستنا ڤێ دەستكەفتنێ واتە مسوگەركرنا پاشەروژا سیاسی یە. لڤێرە یا گرنكە ب پرسین: ئایە دڤان هەلبژارتنێن پەرلەمانێ كوردستانێ یێن بەراهیا مە، تا چ رادە ئەڤ چەندە بەرچاڤ هاتیە وەرگرتن ژلایێ پارتی ڤە ؟

دەمێ كاندیدێن پارتی هاتینە دیاركرن، یاخویا بوو كە پرانیا وان ژ بنكێ جەماوەری (القاعدە الجماهریە ) هاتینە هەلبژارتن نە ژ نوخبا سیاسی یا پێشكەفت ( النخبە السیاسیە المتقدمە)، ڤێ چەندێ پرەكا فرەه دناف بەرا پارتی و جەماوەرێ وێ دا ڤەكریە، كو دیار بوو هەر كەسەكێ چالاك و خودان شیان بیت دەلیڤە دێ بو هەبیت دناڤ رێزین ڤێ حزبێ دا ب گەهیتە مەسترین پلە، كاندید ژ هەمی تەخێن جفاكی هاتینە هەلبژارتن، نە تەمەن و نە رەگەز و نە كار و نە بنەمال نەبوونە ئاستەنگ بەرامبەر ڤان كاندیدا، و ئەڤ جەندە ب دیتنا من خالەكا زور بهێزە د بەژەوەندیا پارتی دا.

ژ لایەكێ دیڤە ئەگەر سەحكەینە بەرنامێ پروپاكندا هەلبژارتنان یێ پارتی دیموگراتی كوردستان دێ بینین كو بەرنامەكێ خزمەتێ و پاشەروژێ یە نە بەرنامێ دیروك و دورژم و ئاخفتنێن بێ كریارە.

 دەمێ سەروكێ حوكمەتێ ئالا زەر بدەستێ خو دگریت و دبێژیت: (متمانە و دەنگ ژ وە، كار و خزمەت ژ مە)، پەیامەكا گرنگە پارتی بو مە دگەهینیت واتە دبێژیت : نە ژبەر كو مە ئەڤە و ئەڤە كرینە دەنگ خوە بدەنە مە لێ ژبەر كو دا ڤێ و ڤێ بو وە بكەین دەنگ خوە بدەنە مە. هەر وەها بەرێز فازل میرانی ئاخفتنەكا پر بها گوتیە، ئەوژی : ئەم وەك پارتی قەردارێت ڤی مللەتی نە، ئەڤجا دەنگ بدەنە پارتی دا كو كارەك بكەڤیتە دەستێ مە ئەم بشێن برێكا وی كاری قەرێ خو بدەین، و قەرێ مللەتێ مەژی رەفاهیەتە ئەم بو دابین بكەین.

ئەڤجا حزبەكا خودان ڤان هزر و پلانان بیت، بێ گومان هەر دێ یا سەركەفتی بیت و باوەریا خەلكی هەر دێ بو وێ بیت.

هەلبژارتنێن بیست وئیكی ئەیلولێ وەك سەروك بارزانی گوتی گرنگترین هەلبژارتنن د دیروكا پارتی دا و دێ بو هەمی جیهانی دیار بیت كو پارتی هەلگرا ناسناما نەتەوایەتیا كوردە، ئەڤرو پەیوەندیا دناڤ بەرا پارتی و جەماورێ وێ بهێزترین شێوە یە، لەوما پێتڤیە كا چەوا پارتی دەستێ خوە بو جەماوەرێ خو درێژ كریە، ب هەمان شێوە جەماورێ پارتی دەستێ خوە بو پارتی درێژ بكەت وب دەنگەكێ بلند دەنگێ خوە بدەتە لیستا 110.