كوردێن ژ ده‌رڤه نه‌شێن پشكداریێ د هه‌لبژارتنێن هه‌رێمێ دا بكه‌ن
رۆژنامەی ئەڤرۆ - سه‌ربه‌ست مسته‌فا سه‌رۆكێ كۆمسیونا بلندا سه‌ربه‌خوه‌یا هه‌لبژارتنان ل عیراقێ ئاماژه ب وێ یه‌كێ دكه‌ت، ده‌قه‌كێ قانوونی نینه كو كۆمسیونێ پێگیر بكه‌ت بنگه‌هێن ده‌نگدانێ ل ده‌رڤه‌ی عیراقێ ڤه‌كه‌ت، له‌وما كوردێن ژ ده‌رڤه‌ی وه‌لاتی دێ بێ به‌هر بن ژ هه‌لبژارتنێن سه‌رۆكایه‌تیا په‌رله‌مانێ كوردستانێ و په‌رله‌مانێ كوردستانێ كو بڕیاره 12/9 یێ ئه‌ڤ ساله بهێنه كرن و گۆت" به‌لێ دێ بۆ كه‌سێن ناڤ هه‌رێمێ و ناڤ عیراقێ بیت، ل سه‌ر مه پێدڤیه و ده‌قێ قانوونی ژی پێ هه‌نه كو بنگه‌هێن ده‌نگدانێ بۆ وان ڤه‌كه‌ین".
سه‌ربه‌ست مسته‌فا ئاماژه ب وێ یه‌كێ كر كو بابه‌تێ نه‌پشكداریكرنا كوردێن ژ ده‌رڤه د هه‌لبژارتنێن هه‌رێمێ دا یێ هاتیه ئێكلاكرن كو نه ژ ئالیێ پراكتیكی و نه ژ ئالیێ دارایی و نه ژ ئالیێ قانوون ڤه، ده‌رفه‌ت ب كومسیۆنێ ناهێته دان، رێ ب وه‌لاتیێن ده‌رڤه بهێته دان پشكداریێ د هه‌لبژارتنێن كوردستانێ دا بكه‌ن و گۆت" ئه‌م ژی دخوازین وه‌لاتیێن ده‌رڤه‌ی هه‌رێمێ پشكداری هه‌لبژارتنان ببن ژبه‌ر كو خه‌لكێ مه‌نه و كوردن و گه‌له‌ك ژ وان چو ناسنامێن دی نینن كو مافێ ده‌نگدانه‌كا دی هه‌بیت"
سه‌رۆكێ كۆمسیونا بلندا سه‌ربه‌خوه‌یا هه‌لبژارتنان ل عیراقێ ئاماژه ب وێ یه‌كێ كر كو رێیه‌ك هه‌یه كه‌سێن ژ ده‌رڤه‌ی وه‌لاتی بشێن پشكداری د هه‌لبژارتنێن سه‌رۆكایه‌تیا هه‌رێمێ و په‌رله‌مانێ كوردستانێ دا بكه‌ن، ئه‌وژی هه‌كه ئه‌ڤ كه‌سێن ژ ده‌رڤه تا 51/5 ئانكو سێ هه‌یڤان به‌ری هه‌لبژارتنان ناڤێ خوه ل كوردستانێ د تومارێن ده‌نگدانێ دا تۆمار بكه‌ن و پاشی ل رۆژا هه‌لبژارتنان ل كوردستانێ به‌رهه‌ڤ ببن دا ده‌نگێ خوه بده‌ن.
سه‌باره‌ت قانوونا ژماره 1 یا سالا 2991 ێ كو به‌حسێ وه‌لاتیێن هه‌رێما كوردستانێ دكه‌ت، كو مافێ هه‌ی ژ ده‌رڤه ژی ده‌نگێ خوه بده‌ن، د به‌رسڤا وێ پرسیارێ دا، سه‌ربه‌ست مسته‌فا سه‌رۆكێ كومسیۆنا بلندا سه‌ربه‌خویا هه‌لبژارتنان ل عیراقێ دیار كر تێگه‌هشتنا وان بۆ ڤێ قانوونێ كو به‌حسێ ده‌رڤه‌ی هه‌رێمێ دكه‌ت مه‌ره‌م پێ ئه‌وه ده‌رڤه‌ی هه‌رێمێ ئانكو ل ناڤ عیراقێ نه ژ ده‌رڤه‌ی عیراقێ و گۆت د هه‌لبژارتنێن به‌ری نوكه ژی یێن په‌رله‌مانێ كوردستانێ كو ل سالا 9002 ێ هاتیه ئه‌نجامدان، هه‌ر وه‌لاتیێن كورد یێن ده‌رڤه‌ی عیراقێ بێ به‌هرببون ژ ده‌نگدانێ".
ژ ئالیێ خوه‌ڤه، ئارام جه‌مال رێڤه‌به‌رێ په‌یمانگه‌ها كوردی بۆ هه‌لبژارتنان راگه‌هاند كو پشكداریكرنا وه‌لاتیان د هه‌لبژارتنێن كوردستانێ دا ل هه‌ر جهه‌كێ بیت، مافه‌كێ سه‌ره‌تایی و دیموكراسی یێ وه‌لاتیانه، ژبه‌ر كو ڤان وه‌لاتیان ره‌گه‌زناما عیراقی یا هه‌ی، هه‌ر چه‌نده راسته قانوون رێكێ ناده‌تێ پشكداریێ د ده‌نگدانێ بكه‌ن، به‌لێ دشیاندایه قانوون بهێته راستڤه‌كرن و سندۆق بۆ وه‌لاتیێن كورد یێن ده‌رڤه‌ی وه‌لاتی ژی بهێنه دانان هه‌روه‌كو چاوا د هه‌لبژارتنێن سالا 0102 ێ یێن عیراقێ دا، سندۆقێن هه‌لبژارتنان بۆ وه‌لاتیێن عیراقی یێن ژ ده‌رڤه‌ی وه‌لاتی هاتینه دانان، له‌وما پێدڤیه كار ل سه‌ر بهێته كرن كو كوردێن ژ ده‌رڤه‌ی وه‌لاتی ژی بێ به‌هر نه‌بن ژ ده‌نگدانێ.
