لە یادی 44 ساڵەی بە پارێزگابوونی دهوكێ دا بۆ یەكەمین جار كەرنەڤاڵێك سازكرا

 راپۆرت : مسلح - ن. دهوك
ل ئێڤاریا 27-5-2013 ب هەلكەفتا بورینا 44 سالا ل سەر پارێزگەهبونا دهوكێ رێڤەبەریا گشتی یا رەوشەنبیری وهونەری ب هەڤكاری دگەل چەند فەرمانگەهێن میری وسازیێن كەرتێ تایبەت ڤیستیڤالەكا مەزن سازكر.
دڤیستیڤالێ دا كەرنەڤالەكێ مەزن هاتبو بەرهەڤكرن كو پتر 30 ترومبێلێن فلات هاتبونە ئامادەكرن ل بەراهیا وان كردوسێن پێشمەرگەی بجلوبەرگێن شورەشێن ئەیلول وگولانێ بون هەروەسا ل سەر هەر ترومبێلەكێ چالاكییەكا تایبەت هاتبو بەرچاڤكرن، دناڤ كەرنەڤالی دا ترومبێلێن قەزایێن پارێزگەهێ ژی هەبون وهەر ئێكێ چالاكیەك ل سەر دانابو دەربرین ژكلتور وپێشكەفتنا وێ قەزایێ دكر دیسان دناڤبەرا هەر تورمبێلەكێدا چالاكیێن هونەری دهاتنە نمایشكرن كو ژهەموو پارێزگەهێن كوردستانێ و پارچێن دن یێن كوردستانێ هاتبون.
كەرنەڤالی ژفلكا KRO دەست پێكر ول نێزیك كومەلگەها زەریلاند ژلایێ لیژنا سەرپەرشتا ڤیستیڤالێ وجەماوەرێ دەڤەرێ دهاتنە پێشوا زیكرن. پاش ل دەم ژمێری 8 ئێڤاری ئاهەنگا هونەری یا مەزن هاتە ل دارخستن ویاریێن ئاگری هاتنە هاڤێتن.
ئەیوب رەمەزان رێڤەبەرێ گشتی یێ رەوشەنبیری وهونەری ل پارێزگەها دهوكێ كو لایەنێ سەرپەشتە بو ساخكرنا وێ روژێ تایبەت بو روژنامەیا خەبات گوت: پشتی بورینا 44 سالا بو ئێكەم جار كەرناڤالەكێ جەماوەری هاتە سازكرن ب مەرەما وێ ئێكێ كو جەماوەر بەشداربیت، ئاستێ كەرنەڤالی ئاستەكێ نەتەوەیی یە ل سەر هەر 4 پارچێن كوردستانێ كەرتێ كەرنەڤالی كلتوری ژمارە ئێكە هەروەسا كەرتێ جڤاكی وئابوری ژی دناڤدا هەیە  زێدەباری وێ هەموو قەزایێن پارێزگەهێ پشكداربون ب رێپیڤانەكا ترومبێلێن فلات وپرانیا فەرمانگەهێن پەیوەندیدار پشكداریكر، دناڤبەرا هەر ترومبێلەكێ دا چالاكیێن دلخوشكەر هاتنە كرن، رێپیڤاناگروپێن ملللی ژهەر چار پارچێن كوردستانێ هاتنە نمایشكرن.
كەرنەڤال ژفلكا KRO دەست پێكر هەتا پاركا زەری پارك پاش ل وێرێ ئاهەنگا هونەری هاتە سازكرن بو ماوێ دوو روژا دێ یا بەردەوامبیت وهونەرمەندێن بناڤ ودەنگ ژكوردستانا باكور هەروەسا هونەرمەندێن بژارە ژ دهوكێ دێ بەشداربن.
ل دور ئارمانجێن ڤێ كەرنەڤالێ ئەیوبی گوت: مەڤیایە دهوكێ ل سەر ئاستێ دەڤەرێ وكوردستانێ وجیهانێ ژرویێ كلتوری وجڤاكی وئابوری وگەشت وگوزاریڤە بدەینە نیاسین وخەلكێ مە حەز باژێرێ خو بكەت وپێشبێخیت.
هەر ل دور ڤیستیڤالێ نڤیسەر ورەوشەنبیری حسن سلێڤانی گوت: بەلافكرنا رەوشەنبیریا كەیف وخوشیێ تشتەكی جوانە ئەڤ پارێزگەها دەلال وجوان ب سروشتێ خو هەژی یە خەلكێ وێ هەردەم دكەیف وخوشیێ دابن، لەورا ساخكرنا 44 سالیا پارێزگەهبونا باژێرێ دهوكێ ئیرو جهێ سەرفرزایا مەیە ئەڤ كەرنەڤالێن جوان وخەملاندی كو پتریا رێڤەبەری ودام ودەزگەهێن باژێری پشكداربوین جهێ سەرفرازیێ یە مە هیڤی یە هەردەم خەلكێ مە یێ تەنابیت یێ ئێكگرتی بیت ودشادیێ دابیت سوپاس بو رێڤەبەریا گشتی یا رەوشەنبیری وهونەری وهەموو لایەكی كو ئەڤ كەرناڤالە ئامادەكرین وئەڤ ئێڤاریە هوسا خوشكری.
هەروەسا ماموستا ونڤیسەر محمد عبداللە ل دور كەرنەڤالێ پارێزگەهێ گوت: براستی ئەڤە جارا ئێكێ یە ئەڤ تشتە ل باژێرێ دهوكێ دهێتە كرن ب دیتنا من ئەڤە تشتەكی هێژایە بو خەلكێ پارێزگەهێ ئەڤە رێكەكە بو بەرباكێن نوو پێگەهشتین كو پتر ب دهوكێ ڤە بهێنە گرێدان، یان ژی ژلایێ دیڤە ئەڤە وێ چەندێ دیاردكەت كو دهوك پتر بهێتە نیاسین وبەرچاڤكرن بو خەلكێ دەوروبەرێن مە، بدیتنا من ئەگەر ئەڤ تشتە هەر سال وبەردەوام بهێتە كرن تشتەكی باشە ومروڤ ژی دێ هزركەت كو مە باژێرەكێ هەی ودێ پتر ب باژێرێ خوڤە هێینە گرێدان. ل دور ئاهەنگا ستران گوتنێ یا كو ب شەڤ ل زەری پارك هاتیە ل دارخستن وتەكنیكا وێ وێنەگر حقی اسماعیل گوت: ئاهەنگ زور یا خوشبو تەكنیكا دەنگی وروناهی گەلەك یا باشبو ئەز باوەردكەم ئەڤە ئێكەم جارە ئەڤ تەكنیكا دەنگی ل كوردستانێ هاتیە ب كارئینان مروڤ ل چ جهێ پاركێ با دا گوه ل ئاهەنگێ بیت، هەروەسا گەلەك شاشە هاتبونە دانان ومروڤی ل هەر جهەكی دشیا تەماشای ئاهەنگێ بكەت دەست خوشیێ ل ئامادەكا ودەرهێنەر وهەموو تەكنیكاران دكەم تشتەكێ باش نیشا خەلكی دا.