پشتی ٦٣ ساڵان روفاتێ شەھید ئیسماعیل تروانشی ھاتە دیتن و ڤەگۆهازتن بۆ گۆڕستانا شاخکێ

دھۆک-KDP. info- پشتی ٦٣ ساڵان روفاتێ شەھید ئیسماعیل تروانشی ھاتە دیتن و ڤەگۆهازتن بۆ گۆڕستانا شاخکێ، سەباح بەیتوللا ھاریکارێ بەرپرسێ مەکتەبا ڕێکخستنێ د پەیڤەکێ دا بناڤێ مەکتەبا ڕێکخستنێ سەرەخۆشی مالبات و کەس و کارێن شاھیدێ نەمر کر.

 ئەڤرۆ ٣ چریا دووێ ٢٠٢٦، ب ئامادەبوونا بەڕێز سەباح بەیتوللا ھاریکارێ بەرپرسێ مەکتەبا ڕێکخستنا پ.د.ک ل بەھدینان و د.ناڤسەر نوری عەبدال بریکارێ وەزارەتا کاروبارێن شەھیدان و ئەنفالکریان، نوینەرێن لقێن ١ و ١٨، کۆمەلەکا شەھیدێن بێ گۆڕ، و ڕێڤەبەرییا گشتی یا شەھید و ئەنفالکریان ل پارێزگەھا دھۆکێ، ڕوفاتێ شەھید ئیسماعیل محەمەد ئەحمەد تروانشی پشتی ٦٣ ساڵان هاتە دیتن و د ڕێوڕەسمەکێ ژ ھەژی دا بۆ گوڕستانا شاخکێ هاتە ڤەگوھازتن و ڤەشارتن.

شەھیدێ نەمر بەری ٦٣ ساڵان ل داستانا چیایێ مەتینی شەھید ببوو و ژ لایێ ھندەک کەسێن خەلکێ گوندێ ئەرەدنا ڤە دناڤ ڕەزەکێ گوندی دا ھاتبوو ڤەشارتن. پشتی دانانا تاجەگولینەیێن مەکتەبا ڕێکخستنێ، لقا ئێکێ پارتی وەزارەتا کاروبارێن شەھێدان و گوندێ تروانش ل سەر گۆڕێ شەھیدی، بەڕێز سەباح بەیتوللا ھاریکارێ بەرپرسێ مەکتەبا ڕێکخستنێ د پەیڤەکێ دا بناڤێ مەکتەبا ڕێکخستنێ سەرەخۆشی مالبات و کەس و کارێن شاھیدێ نەمر کر و ڕۆلێ شەھیدێ نەمر و مالباتا وی د شۆڕشا ئەیلۆلێ و بزاڤا ڕزگاریخوازیا گەلێ مە دا، ب لاپەڕەیەکێ زێڕین و پڕشنگدار ل قەلەم دا و شەھیدبوون ب پلەیەکا بلند یا شانازیێ وەسفکر دا.

پاشان د.ناڤسەر نوری عەبدال بریکارێ وەزارەتا کاروبارێن شەھید و ئەنفالکریان ڕۆلێ شەھیدیێ قارەمان بلند نرخاند. ل دووڤ دا پەیڤا بنەمالا شەھیدی و گوندێ تروانش ژلایێ ئدریس تروانشی ڤە ھاتە خواندن و تێدا سوپاسیا مەکتەبا ڕێکخستنێ، وەزارەتا کاروبارێن شەھیدان، لقێن پارتی، خەلکێ جامێر و مرۆڤدۆستێ ئەرەدنا کر بۆ ڕۆلێ ھەمیا د ڤێ ڕێوڕەسمێ دا.

ل دووماھیێ ب نوینەراتیا گوندێ ئەرەدنا عەمید رەمەزان پەیڤەک پێشکەش کر و تێدا ئاماژە ب قارەمانیا شەھیدێ نەمر دا و پاراستنا گۆڕا وی بۆ دەمێ ٦٣ ساڵان کو ئەڤرۆ ڕادەستی کەس و کارێن وی کر.