دەڤەردارێ دهۆکێ بۆ KDP.info: بۆ ڕێگریکرن ژ لافاوان هەمی ئامادەکاریێن هاتینە کرن

دهۆک-KDP.info- دەڤەردارێ دهۆکێ ڕادگەهینیت، د چارچۆڤێ بەرهەڤیان بۆ وەرزێ زڤستانێ و ب ئارمانجا پاراستنا ژیانا وەلاتییان و ڕێگریکرنێ ژ لافاوان، هەمی ئامادەکاریێن پێدڤی ل سەرانسەری قەزایا دهۆکێ هاتینە کرن و زنجیرەکا پڕۆژێن سولین و ئاڤڕێژان ژی هاتینە جێبەجێکرن.

د لێدوانەکا تایبەت دا بۆ ماڵپەڕێ فەرمیێ پارتی دیموکراتی کوردستان، بریندار حەیدەر، دەڤەردارێ دهۆکێ ڕاگەهاند، "وەک دەڤەردارییا قەزایا دهۆکێ ب هەماهەنگی دگەل پارێزگەها دهۆکێ و رێڤەبەریێن پەیوەندیدار، هەمی ڕێکار و ئامادەکاری هاتینە کرن دا کو تەنگاڤییێن وەرزێ زڤستانێ ب کێمترین زەرەر دەرباز ببن. پرۆسەیا پاقژکرنا ڕەخ و دورێن جادە و نهالێن ئاڤڕێژان کو د وەرزێ زڤستانێ دا ئاستێ ئاڤێ لێ بلند دبیت بەردەوامە. هەروەسا سەرۆکاتیا باژێرڤانیا دهۆکێ و رێڤەبەریا سولینان د بەرهەڤیێ دا نە بۆ پاقژکرنا سولینان و تایبەت ڕووبارێ هشکەرۆ."

دەڤەردارێ دهۆکێ جەخت ل سەر پشتەڤانیا بەردەوام یا پارێزگارێ دهۆکێ کر و دیار کر کو هەماهەنگیەکا زۆر باش د ناڤبەرا هەمی فەرمانگەه و رێڤەبەریێن ل سنورێ قەزایێ دا هەیە.

ژ لایێ خۆ ڤە، ئەندازیار یونس جانو، رێڤەبەرێ سولینێن پارێزگەها دهۆکێ بۆ KDP.info دووپات کر، "کۆمەکا تیمان ل ناڤ باژێڕی هاتینە بەرهەڤکرن بۆ سەخبێرکرنا سولینان و چارەسەرکرنا کێشەیێن زڤستانا بووری. هەروەسا ڕووبارێ هشکەرۆ ژی ژ لایێ باژێرڤانیێ ڤە دهێتە پاقژکرن."

رێڤەبەرێ سولینان ئاشکرا ژی کر، "د ئەڤ ساڵە دا، چەندین پڕۆژێن بچووک ل سەر پێشینەیێن هەیڤانە ل ناڤ سەنتەرێ دهۆکێ و قەزایێن پارێزگەهێ ب گوژمێ نزیکی ٤٨٠ ملیۆن دیناران هاتینە دروستکرن. دیسان پڕۆژەیەکێ دی یێ سولینێ ل مالتا خوارێ ب درێژاهیا ٨٤٠ مەتران ب تەمویلا ڕێکخراوا ILO یا نەتەوەیێن ئێکگرتی و وەزارەتا دەرڤە یا هۆڵەندا ب بهایێ ٨٤٠ ملیۆن دیناران هاتیا دروستکرن، دگەل چارەسەرکرنا ئاریشا سولینا چوارڕیانا ئێتیتێ ب گوژمێ ٣٤ ملیۆن دیناران ل سەر بودجەیا پارێزگەهێ، ئەڤە هەمی دێ بنە ئەگەرێ دەربازکرنا زڤستانەکا ب کێمترین زەرەر."

سەجا شێرزاد