سەرۆکی ھەرێمی کوردستان پیرۆزبایی لە ئەبوو کاروان دەکات
ھەولێر-KDP.info- سەرۆکی ھەرێمی کوردستان، پیرۆزبایی لە بەڕێز ئەبوو کاروان دەکات بە بۆنەی ھەڵبژاردنی بە سکرتێری کۆمیتەی ناوەندیی حزبی شیووعیی کوردستان و سەرکەوتنی کۆنگرەکەیانەوە.
ئێوارەی ئەمڕۆ چوارشەممە ٢٠٢٥/٦/٢٥ بەڕێز نێچیرڤان بارزانی، سەرۆکی ھەرێمی کوردستان، لە پەیوەندییەکی تەلەفۆنیدا بە بۆنەی ھەڵبژاردنی بە سکرتێری کۆمیتەی ناوەندیی حزبی شیووعیی کوردستان و سەرکەوتنی کۆنگرەکەیانەوە، بە گەرمی پیرۆزبایی لە بەڕێز ئەبوو کاروان کرد و ھیوای سەرکەوتنی بۆ خۆیان و ھاوڕێیانی لە حزبی شیووعیی کوردستان خواست.
بەڕێز سەرۆکی ھەرێمی کوردستان ھەروەھا ستایشی تێکۆشان و خەبا‌تی پێشمەرگایەتی و قوربانیدانی بەڕێز ئەبوو کاروان و خانەوادە بەڕێزەکەیان و حزبی شیووعیی کوردستانی کرد و ھەموو پشتگیرییەکی بۆ سەرخستنی ئەرکەکەی لە سەرکردایەتیکردنی حزبدا بۆ بەڕێزیان دووپات کردەوە.
لای خۆیەوە بەڕێز سکرتێری کۆمیتەی ناوەندیی حزبی شیووعیی کوردستان، سوپاس و پێزانینی خۆی و ھاوڕێیانی لە حزبی شیووعی بۆ پەیوەندی و پیرۆزبایی و پشتگیریی سەرۆک نێچیرڤان بارزانی دەربڕی و ھیوای سەرکەوتنی بۆ خواست.
