بە فەرمانی سەرۆكی حكوومەت زەوی بەسەر خانەنشینانی سنووری ماددەی 140دا دابەش دەكرێت
هەولێر -KDP.info- پاڵپشت بە فەرمانی مەسروور بارزانی، سەرۆكی حكوومەتی هەرێمی كوردستان، زەوی بەسەر فەرمانبەران و خانەنشینانی حكوومه‌تی هه‌رێمی كوردستان له سنووری ماددەی 140ی دەستوور و ناوچە كوردستانییەكانی دەرەوەی ئیدارەی هەرێمی كوردستاندا دابەش دەكرێت.
ئەمڕۆ یەكشەممە، 28ی تەمووزی 2024، ساسان عەونی وەزیری شارەوانی و گەشتوگوزار ڕایگەیان مەسروور بارزانی، سەرۆكی حكوومەتی هەرێمی كوردستان فەرمانی كردووە و ڕایسپاردووین بۆ ئەوەی كاری پێویست ئەنجام بدرێت، بۆ دابەشکردنی زەوی بەسەر فەرمانبەران و خانەنشینانی حكوومەتی هەرێمی كوردستان كە هەڵگری كارتی زانیاریی ناوچەكانی ماددەی 140ی دەستوور و دەرەوەی ئیدارەی هەرێمی كوردستانن.
وەك لە لاپەڕەی فەرمیی وەزارەتی شارەوانیدا هاتووە، سەبارەت بە جێبەجێكردنی بڕیارەكەی سەرۆكوەزیران, ساسان عەونی دەڵێ: نووسراومان ئاراستەی گشت وەزارەت و دەستە و فەرمانگە و دامودەزگەكانی حكوومەتی هەرێمی كوردستان كردووە: "پاڵپشت بە ڕەزامەندیی ڕێزدار جەنابی سەرۆكوەزیران، كاری پێویست ئەنجام بدەن و فۆڕمی زەوی بدەن بەو فەرمانبەر و خانەنشینانەی حكوومەتی هەرێمی كوردستان كە هەڵگری كارتی زانیاریی ناوچەكانی ماددەی (140)ی دەستوور و دەرەوەی ئیدارەی هەرێمی كوردستانن و لەگەڵ لیستی وەزارەت و دەستە و فەرمانگە و دامودەزگانی نەبەستراو بە وەزارەت بەرز بكرێتەوە، دواتر وەزارەتی شارەوانی و گەشتوگوزار شوێنی وەرگرتنی زەوییان بۆ لە نزیكترین شوێنی نیشتەجێبوون یان بوونی زەوی بەردەست دەستنیشان دەكات".
ئەمەی خوارەوە دەقی نووسراوەكەیە:
